Accueil » Parole de Dieu (en Kirundi) » Dimanches (Page 46)
Archives de Catégorie: Dimanches
Mes Photos sur Flickr
IDOMINIKA YA 2 YO MU KAREMA (Umwâka B)
IGISOMWA CA MBERE
Ivyo dusoma mu gitabu c’Amamuko (22, 1-2. 9a. 10-13. 15-19)
Ishikanwa rya sokuru wacu Ibrahimu
Umusi umwe, Imana ishaka kugeza Ibrahimu, iramwakura iti : « Ibrahimu ! »
Ayishura ati : « Sabwe, Mukama ! »
Imana na Yo iti : « Fata umwana wawe, ca kinege ukunda cane, Izahaki, ugende mu gihugu ca Moriya kumutangako ituro ry’Imana, ku musozi nza kukwereka. »
Bamaze gushika aho Imana yari yamurangiye, Ibrahimu yubaka ururhimbi, arundako za nkwi, araheza afata Izahaki umwana wiwe araboha, amutereka ku ruhimbi hejuru y’inkwi. Ibrahimu araramvura ukuboko, afata inkota ngo asogote umwana wiwe.
Umumarayika w’Umukama yamara avugira mu kirere ati : « Ibrahimu ! Ibrahimu ! »
Aramwishura ati : « Sabwe, Muhanyi ! »
Umumarayika na we ati : « Nturoreshe ukuboko ku mwana wawe ! Ntihagire ikibi umugirira ! Ndazi noneho ko wubaha Imana, ntiwanyimye umwana wawe, ikinege cawe kimwe rudende. »
Ibrahimu araramuye amaso, abona impfizi y’intama, amahembe afashwe n’igisaka. Ibrahimu arayifata, ayitangako ituro ry’Imana mu kibanza c’umuhungu wiwe.
Umumarayika atumwe n’Umukama asubira kwakura Ibrahimu ubwa kabiri, ati : « Ndarahiye, kw’izina ry’Umukama, kubera ko wubahutse gukora ivyo, ntiwimane umwana wawe, ikinege cawe kimwe rudende, nzoguhunda imihezagiro, abuzukuru n’abuzukuruza bawe bazogwira nk’inyenyeri zo kw’ijuru, bazongana n’umusenyi wok u nkombe z’ikiyaga, bazokwirahira abansi babo babigambe. Kw’izina ryabo, imiryango yose yo kw’isi izohezagirwa, kuko wagamburukiye Imana. »
IZABURI 115 (116), 10. 15. 16-17. 18-19
Icit : Nzokwama ngendera imbere y’Umukama,
kuri iyi si y’abazima.
Nari nizeye Umukama, aho navuga nti :
« Ndagowe cane ! »
Urupfu rw’abamwishimira
Umukama ntaruraba ryiza.
Ewe Mukama,
jewe ndi umusuku wawe,
umwana w’incoreke yawe :
warankuye mu mvuto.
Nzogushikanira igiturire co kugukengurukira,
kandi ntabaze izina ryawe, Mukama ;
ivyo nemereye Umukama nzobikora vyose,
mu maso y’abiwe bose bakoranye.
IGISOMWA CA KABIRI
Ivyo dusoma mw’Ibaruwa Umutumwa Paulo yandikiye Abaromani (8, 31b-34)
Imana ntiyimanye Umwana wayo
Ncuti zanje,
Ko Imana isanzwe iturwanira, ni nde yoturwanya? Ko itimanye umwana wayo bwite, ariko ko yamuduhebeye twese, icoyitesha noneho kutugabira ibisigaye vyose kuri uno Mwana, ni iki? Ni nde azokwagiriza abatowe n’Imana? Mbega, Imana si Yo ibagira intungane? Ni nde azobacira urwo gutsindwa? Mbega, ni Yezu Kristu, kandi ari We yapfuye agaheza akazuka, akaba kandi ari We yicaye iburyo bw’Imana akatwambariza?
INKURU NZIZA
Kristu urakaninahazwa,
Wewe Jambo ryamaho ry’Imana nzima.
Muri ca gicu gica ibikeke
rya Data rirumvikana, riti :
« Uyu ni Umwananje nkunda cane :
nimumutege amatwi. »
Kristu urakaninahazwa,
Wewe Jambo ryamaho ry’Imana nzima.
Ivyo dusoma mu Nkuru Nziza yanditswe na Mariko (9, 2-10)
Uyu ni Umwana wanje nkunda cane
Umusi umwe,
Yezu atora Petero, Yakobo na Yohani, abajana bonyene ahiherereye ku musozi muremure. Araheza arihindura babona : impuzu ziwe zirakayangana nk’umwerasi wahejeje, bimwe ata mumeshi kw’isi yoshobora kweresha impuzu ukuraho.
Hanyuma, Eliya na Musa barababonekera, baganira na Yezu. Buno rero Petero abwira Yezu ati : « Muhanyi, birahimbaye ko tuba aha : ingo, tugire insago zitatu, rumwe rw’iwawe, urundi rwa Moshe n’urundi rwa Eliya. » Ntiyari azi ico yariko aravuga kuko bari bacitse ivutu.
Haza igicu kirabatwikira, muri nya gicu kandi hava ijwi riti : « Uyu ni Umwana wanje nkunda cane, nimumwumve ! » Buno nyene, baravye irya n’ino, nta wundi n’umwe babona hamwe na bo, atari Yezu musa.
Bariko baramanuka nya musozi, Yezu arababuza kugira uwo babwira ico bari babonye, Umwana w’umuntu atamaze kwizura mu bapfuye. Na bo bakora uko ababwirije ; ariko babazanya bonyene ivyo ari vyo ‘ukuzuka ava mu bapfuye’.
Partager
IDOMINIKA YA 1 YO MU KAREMA (Umwâka B)
IGISOMWA CA MBERE
Ivyo dusoma mu gitabu c’Amamuko (9, 8-15)
Isezerano Imana yasezeranye na Nohe igihe yamukiza amazi y’isegenya
Isegenya ihavuye,
Imana irahava ibwira Nohe n’abahungu biwe iti : « Mwebwe rero, mwe n’abuzukuruza banyu, turuzuye ; » kandi iti : « Nuzuye n’ivyo biremwa vyose bigendagenda muri kumwe : inyoni, ibitungwa, inyamaswa, eka ico cose casohotse kiva mu bwato, ibikoko vyose vyo kw’isi. Wewe rero turacuditse, singisubira guhonya abantu n’amazi y’isegenya, sinzosubira gutikiza isi. »
Imana yongera irungikanya iti : « Mbere ng’iki ikimenyetso c’uko nuzuye n’abantu n’ibikoko muri kumwe ubutacisubirako : nshize mu kirere umunywamazi wanje ngo umenyeshe ubucuti bwanje n’isi. Aho nzozana ibicu hejurur y’isi, uwo muheto w’umunywamazi uzobonekera kuri vyo, nanje nzokwibuka iryo sezerano ryanje nshize hagati yanje namwe, be n’ibiri n’ubuzima vyose bifise umubiri ; kandi amazi ntazokwongera kuba umurengera wo guhonya ibifise umubiri vyose. »
IZABURI 24 (25), 4bc-5ab. 6bc. 8-9
Icit : Inzira zawe, Mukama, zuzuye urukundo n’ukuri,
Ku bazigama isezerano ryawe.
Ntabara, Mukama, undangire inzira y’iwawe,
Uranyigisha inzira zawe.
Urantumbereza ukuri, uranyigisha,
Ni Wewe Mana izonkiza.
Gira wibuke imbabazi zawe, Mukama,
Wibuke n’urukundo rwawe, kuko ari ivya misi yose.
Nk’uko urukundo rwawe rwamaho,
N’ube ari ko unyibuka, Mukama.
Ese ubutungane n’urukundo vy’Umukama !
Umukama yama agarura abazimiye.
Abatobato abigisha izina ryiwe,
Abicisha bugufi abigisha inzira yiwe.
IGISOMWA CA KABIRI
Ivyo dusoma mw’Ibaruwa rya mbere ry’Umutumwa Petero (3, 18-22)
Amazi y’ibatisimu yadukijije ibicumuro vyacu
Bakunzi banje,
Kristu we nyene yarapfuye rimwe rizima kubera ibicumuro, intungane igapfira abononyi, kugira ngo adushikane ku Mana ; yarishwe ku vy’umubiri, ariko yarasubiye kuba muzima ku vy’umutima. Uwo mutima, ni wo yajanye guhumuriza imitima yari mw’ibohero, ya mitima yari yanse kwemera kera aho ubwiyumanganyi bw’Imana bwarorera mu misi ya Nohe, bwa bwato bukibazwa ; muri ubwo bwato, abantu bakeyi bashika umunani barashoboye gukizwa n’amazi. Ayo mazi aramenyesha ya Batisimu ibakiza namwe ubu : ntikibakiza mu gukura ico ry’umubiri, ariko irabakiza mu kuba isezerano ry’umutima mwiza n’Imana kubera izuka rya Yezu Kristu, We yuriye mw’ijuru akavyagira iburyo bw’Imana, amaze kugandura abamarayika, imbasha n’intwaza z’ijuru.
INKURU NZIZA
Ijambo ryawe ni ukuri, Mukama,
itegeko ryawe na ryo ni ubukiriro.
Umuntu ntatungwa n’indya gusa,
ariko aratungwa n’ijambo ryose riva mu kanwa k’Imana.
Ijambo ryawe ni ukuri, Mukama,
itegeko ryawe na ryo ni ubukiriro.
Ivyo dusoma mu Nkuru Nziza yanditswe na Mariko (1, 12-15)
Arageragezwa na shetani, na bo abamarayika baramumara inzara
Yezu amaze kubatizwa, Mutima aca amutwara mu gahinga. Mu gahinga rero, ahamara imisi mirongo ine ageragezwa na shetani. Yabana n’ibikoko, na bo abamarayika baramumara inzara.
Yohani Batista amaze gufatwa, Yezu aza i Bugalile yigisha Inkuru Nziza y’Imana, ati : « Umusi washitse kandi Ubwami bw’Imana buri hafi ; igarure kandi mwemere Inkuru Nziza.
Partager
IDOMINIKA YA 6 YO MU MWAKA (Umwâka B)
IGISOMWA CA MBERE
Ivyo dusoma mu gitabu ca Bene Levi (13, 1-2. 45-46)
Ibwirizwa ryari ryerekeye abanyamibembe
Muri irya misi, Umukama yabariye Musa na Aroni ati : « Umuntu niyagira ku rukoba inkavyi, igitongangira canke ikibibi comenyesha indwara y’imibembe, nibamuzanire umuherezankuka Aroni canke umwe wo muri bene Aroni b’abaherezankuka. Umunyamibembe iyo arwaye iyo ndwara, n’agende yambaye impuzu zitabutse, asambaguye imishatsi yiwe, yipfutse ku munwa, agende arasemerera ati : “Ndahumanye ! Ndahumanye !” Imisi yose akirwaye iyo ndwara, azoba ahumanye ; mbere azoba ari uwahumanye, abe ukwiwe, aze abe hirya y’aho mugandagaje. »
IZABURI 31 (32), 1-2. 5. 11
Icit. : Ni Wewe mahungiro yanje,
Unsanganize impundu z’uko ndokotse.
Hahiriwe uwarekuriwe igicumuro,
uwakize akabi kiwe ;
hahiriwe urya
Umukama ataco yagiriza.
Navuze nti : « Ngiye gutumbera Umukama,
nirege ibicumuro nakoze. »
Nawe, Mukama,
warandekuriye ikibi nakoze.
Nezerwa, himbarwa n’Umukama,
mwa bantu b’intungane ;
mutambe, mutarike,
mwebwe mufise umutima ugororotse.
IGISOMWA CA KABIRI
Ivyo dusoma mw’Ikete rya mbere Umutumwa Pawulo yandikiye Abanyakorenti (10, 31 – 11, 1)
Nimunyigane nk’uko nanje nigana Kristu
Ncuti zanje,
Iyo murya canke iyo munywa canke iyo mukora ikindi ico ari co cose, nimukore vyose ngo muninahaze Imana. Ntihagire abo mutirimutsa, baba Abayuda, baba Abagereki, yaba Ekleziya y’Imana, nk’uko nanje kunezereza bose muri vyose, ntarondera ikingirira akamaro jenyene, mugabo nkarondera ikigirira akamaro benshi, ngo babone gukira. Nimunyigane nk’uko nanje nigana Kristu.
INKURU NZIZA
Aleluya, aleluya.
Umuhanuzi mukuru yaserutse iwacu,
Imana yaramukije igihugu cayo.
Aleluya.
Ivyo dusoma mu Nkuru Nziza ya Yezu Kristu nk’uko yashikirijwe na Mariko (1, 40-45)
Imibembe iranyika, aca arakira
Umusi umwe, umunyamibembe yegereye Yezu aramutakambira, akubita ibipfukamiro hasi, ati : « Mukama, ubishatse wonkiza. » Imbabazi zivyutse, Yezu araramvura ukuboko aramukorako, ati : « Ndabishatse, kira. » Buno nyene, imibembe iranyika, aca arakira. Yezu yamara aca amera nk’uwumuhambarira, aca aramusohora, amubarira ati : « Umenye ntugire uwo ubibwira, genda riho wiyereke umuherezankuka, kandi utange, kuko wakize, ivyo Musa yashinze. Ni co kizobereka ko wakize. » We rero yapfuye gusohoka, aca aja mu vyo kubivugira hejuru n’ugukwiza ivyabaye ; kikaba ari co mbere kibuza Yezu kuba akigira igisagara yinjiramwo icese. Yaguma ahiherereye mu gahinga, kandi bakava irya n’ino bakamusangayo.
Évangéliser les aréopages contemporains 