Accueil » Parole de Dieu (en Kirundi) » Fêtes & Solennités (Page 28)
Archives de Catégorie: Fêtes & Solennités
Mes Photos sur Flickr
IBATISIMU Y’UMUKAMA
MENYA NEZA: Umusi bahimbaza Epifaniya y’Umukama nihaba ari itariki 7 canke 8 Nzero, bagira umusi mukuru w’Ibatisimu y’Umukama ku musi wa mbere ukurikira iyo dominika, kandi, batarasoma Inkuru Nziza, batora igisomwa kimwe gusa muri vya bisomwa vyahagenew
Mu mwaka B no mu mwaka C, imbere y’Inkuru Nziza, bashobora gusoma ibindi bisomwa bidasa na bimwe twabona mu mwaka A. Na vyo ng’ibi:
IGISOMWA CA MBERE
Ivyo dusoma mu gitabu c’Umuhanuzi Izaya (55, 1-11)
Nimuze mwegere isôko
Ng’iri iriyazwe n’Umukama :
Mwebwe mwese munyotewe, nimuze mwegere isôko,
n’aho mutoba mufise amafaranga nimuze.
Gura ingano, mwihereze umuvinyu n’amata,
n’aho ata mafaranga mugira.
Mbe ni kuki mutagaguza amahera mu bintu bitari ibifungurwa,
umushahara wanyu ugaherera mu bitabahaza ?
Ntege amatwi, muzoheza murye ibiryoshe,
muzonezerezwa n’ibisosa.
Ntege abiri, muze iwanje,
nyumvirize, niho umutima wanyu uzokira.
Nzosezerana namwe isezerano ryamaho,
rishimikiye ku ngabirano zemerewe Dawidi.
Ehe raba, nakugize icabona mu makungu,
nagutoye ngo ube umukuru n’umutegetsi mu mahanga.
Uzohamagara intara utari uzi,
abantu utari bwabone bace bakwirukira,
kubera Umukama Imana yawe,
kubera Umweranda w’Israeli azoba yaguteye iteka.
Rondera Umukama igihe agishaka kuboneka,
mwambaze igihe akiri hafi.
Umubisha n’ahebe amayira yiwe,
umunyakabi n’ahindure ivyiyumviro vyiwe.
N’agaruke ku Mukama, na We azoheza amugirire ikigongwe ;
n’agaruke ku Mana yacu, na Yo iri n’imbabazi nyinshi.
Umukama yavuze ati :
« Ivyiyumviro vyanje ntibisa n’ivyanyu,
amayira yanje si yo yanyu.
Nk’uko ijuru rirengeye isi,
Niko amayira yanje arengeye ayanyu,
Ivyiyumviro vyanje bigasumba ivyanyu.
Nka kurya imvura n’urume bigwa biva mw’ijuru
Ntibisubireyo bitavomeye isi ngo biyirondore,
Ibiterwa bikamera,
Umubivyi akaronka imbuto n’imfungurwa,
Niko n’ijambo rivuye mu kanwa kanje,
Ritangarukako ritagize akamaro,
Ritaranguye ico nshaka,
ridakoze ico naritumye. »
URURIRIMBO (Izaya 12, 2-3. 4bcd. 5-6)
Icit : Muzovoma amazi mu masôko y’urukiza,
akanyamuneza kabasya.
Ng’iyi Imana y’urukiza rwanje,
ndayizeye, ntaco ngitinya ;
kuko Umukama ari We bukomezi bwanje n’ururirimbo rwanje,
ubukiriro bwanje ndabukesha We.
Muzovoma amazi mu masôko y’urukiza,
Akanyamuneza kabasya.
Kurira ubwatsi Umukama, ninahaza izina ryiwe,
Nimukwize mu makungu yose ibitangaza vyiwe,
Ibutsa intara zose ko izina ryiwe ari rurangiranwa.
Curarangira Umukama,
kuko yakoze igitangaza cakwiye isi yose.
Himbarwa, nezerwa, bantu bo muri Siyoni,
kuko ari n’ijunja hagati yanyu Umweranda w’Israeli !
IGISOMWA CA KABIRI
Ivyo dusoma mw’Ibaruwa rya mbere ry’Umutumwa Yohani (5, 1-9)
Mutima, amazi n’amaraso
Bakunzi banje,
Uwemera wese yuko Yezu ari Kristu, ni we yavyawe n’Imana ; kandi uwukunda wese uno Muvyeyi aba akunda kandi uwavyawe na We. Ng’iki ikimenyetso c’uko dukunda abana b’Imana : nitwakunda Imana tugakora amabwirizwa yayo. Nkako nyene, ng’uru urukundo rw’Imana : ni ukuzigama amabwirizwa yayo. Na yo amabwirizwa yayo ntaremereye, kuko icavyawe n’Imana cose gitsinda isi. Kandi iyo ntsinzi yatsinze isi, ni ukwemera kwacu.
Ni nde uwutsinda isi, atari uwemera ko Yezu ari we Mwana w’Imana ? Yezu ni we uwaje mu mazi no mu maraso : si mu mazi yonyene, ariko ni mu mazi no mu maraso. Kandi Mutima ni we avyemeza, kuko Mutima ari We Kuri. Nkako, ibivyemeza biri gutatu : Mutima, amazi n’amaraso, kandi ivyo bitatu bihuriza hamwe. Nitwaba twakira ivyo abantu batwemeza, ico Imana itwemeza co kirabiruta na kure. Nkako, ico Imana itwemeza, ni icerekeye Umwana wayo.
INKURU NZIZA
Ntihinduka
Alleluia, alleluia.
Yohani abona Yezu aje amwerekeye, aca avuga ati :
« Ng’uyu Umwagazi w’Imana, ng’uyu uwukura abantu ibicumuro. »
Alleluia.
Ivyo dusoma mu Nkuru Nziza yanditswe na Mariko (1, 7-11)
Uri Umwananje nkunda cane, waranshitse ku nyota
Muri irya misi,
Yohani Batista yariko arigisha mu gahinga avuga ati : « Uwuje mu nyuma zanje arandusha ububasha, mbere sinkwiye n’ugupfundurura utuzana tw’ibirato vyiwe. Jewe nababatije mu mazi gusa, ariko We azobabatiza muri Mutima Mweranda. »
Muri irya misi, Yezu avuye i Nazareti mu Bugalile, abatizwa na Yohani mu ruzi Yordani. Igihe rero akutse ava mu mazi, abona ijuru ririyuguruye, na we Mutima amwururukirako mu gisa n’inuma. Mw’ijuru rero hava ijwi riti : « Uri Umwananje nkunda cane, waranshitse ku nyota. »
Partager
Idominika ya 34 yo mu mwaka = UMUSI MUKURU WA KRISTU UMWAMI
IGISOMWA CA MBERE
Ivyo dusoma mu gitabu c’Umuhanuzi Ezekiyeri (34, 11-12. 15-17)
Imana, Umwami n’Umwungere wa Israeli, ni We Mucamanza
Ng’iri iryo Umukama Imana avumereye :
Noneho, jewe ubwanje ndigiriye kurondera intama zanje, ndazibungabunge. Nk’uko umwungere abungabunga ubusho bw’intama ziwe zashwiragiye, ni ko nzobungabunga intama zanje, ndazikure aho hose zashwiragiriye ku musi w’igipfungu. Ni jewe nyene ubwanje nzoragira intama zanje, ni jewe nzozicura : – uko ni ko Umukama Imana avuze.-
Nzorondera iyatakaye, ngarukane iyazimiye ; nzokanda iyakomeretse, mvure iyirwaye ; iyivyibushe igakomera na yo nzoyihozako ijisho, ndayiragire mu butungane.
Namwe, busho bwanje, – uko ni ko Umukama Imana avuze, – menye ko ngiye guca urubanza, nsobanure intama n’izindi, ntandukanye impfizi z’intama n’amasuguru y’impene.
IZABURI 22 (23), 1-2a. 2b-3. 5-6
Icit : Umukama ni We mwungere wanje,
Ntaco nokena.
Umukama ni We mwungere wanje,
Sinzokena ;
ni We amvyagiza
mu canya c’ubwatsi buremvye.
Iruhande y’amazi adasuma, ni ho azonshikana,
aremeshe umutima wanje ubudasiba.
Ni We anyoborera inzira nziza
Kubw’izina ryiwe.
Untegurira ameza
Mu maso y’abansi ;
waransize amavuta ku mutwe,
igikombe canje kirasesekaye.
Eka mbere mu buzima bwanje
Namana impore n’ubuhirwe ;
Inzu yanje ni ingoro y’Umukama
Imisi yose y’ubuzima bwanje.
IGISOMWA CA KABIRI
Ivyo dusoma mw’ibaruwa rya mbere Umutumwa Paulo yandikiye Abakorenti (15, 20-26. 28)
Azoheza ashikanire ubwami Imana Se, kugira ngo Imana ihangame muri vyose
Ncuti zanje,
Kristu yarazutse mu bapfuye, aba ari we abatangurira. Ko urupfu rwazanywe n’umuntu umwe, n’izuka ry’abapfu riza
nwa n’umuntu umwe. Nk’uko abantu bose bapfa muri Adamu, ni ko abantu bose bazozuka muri Kristu. Mugabo, umwe umwe wese azoronka ikibanza bikwiranye : Kristu azoja imbere abatangurire, hanyuma abazoba bamwemeye bamukurikire igihe azogaruka. Hanyuma vyose bizorangira, aho azoshikiriza Se wiwe ya ngoma yamuha, mugabo abanje gutsinda Inganji zose, Ubukuru n’Ububasha. Kuko birakwiye ko ahangama ku ngoma gushika umusi azoba yatsinze abansi biwe bose. Umwansi yanesheje ubwa nyuma, ni urupfu. Ibintu vyose nivyamara kumwegukira, Umwana w’Imana azoheza yishikane ku wamuhaye inganji y’ibintu vyose, kugira ngo Imana ihangame muri vyose.
INKURU NZIZA
Alleluia, alleluia.
Iragahezagirwa ingoma ya sokuru wacu Dawidi,
ari yo ngoma y’ibihe bishasha !
N’ahezagirwe uwuje kw’izina ry’Umukama !
Alleluia.
Ivyo dusoma mu Nkuru Nziza ya Yezu Kristu nk’uko yashikirijwe na Matayo (25, 31-46)
Azovyagira ku ntebe y’ubuninahazwa bwiwe, aheze abasobanure
Muri irya misi,
Yezu yabariye abigishwa biwe ati : « Aho Umwana w’Umuntu azogarukira mu buninahazwa bwiwe, ari kumwe n’abamarayika biwe bose, azovyagira ku ntebe y’ubuninahazwa bwiwe. Abantu bose bazokoranira imbere yiwe, aheze abasobanure nk’uko umwungere asobanura intama n’amahushi : intama azoziherereza iburyo, na yo amahushi ibubamfu.
Umwami azobarira abari iburyo bwiwe ati : ‘Nimuze, batoni ba Data, muronke ubwami yabateguriye isi itararemwa. Narashonje murangaburira ; naranyotewe murampa utwo nywa ; nari akavantara murantora ; nagenda gusa muranyambika ; nari ndwaye murandaba ; ndi mw’ibohero murandamutsa.’
Aberanda na bo bazomwishura bati : ‘Mukama, twakubonye ryari ushonje tukakugaburira, unyotewe tukaguha ico unywa ? Twakubonye ryari uri akavantara ngo tugutore, ugenda gusa tukakwambika ? Twakubonye ryari urwaye canke uri mu ngoyi tukakuraba ?’
Umwami na we azobishura ati : ‘Ni ukuri ndabibabwiye : ico cose mwagiriye umwe umwe muri abo batobato mu bo tuvukana, ni je mwakigiriye.’
Azobarira abari ibubamfu na bo ati : ‘Nimumvireho mwa bivume mwe, mugende mu muriro udahera wateguriwe Shetani n’abamarayika bayo. Narashonje ntimwangaburira ; naranyotewe munyima utwo nywa ; nari akavantara ntimwantora ; nari gusa ntimwanyambika ; nararwaye, nja mw’ibohero, ntimwandaba.
Na bo bazomwishura bati : ‘Mukama, twakubonye ryari ushonje, unyotewe, uri akavantara, uri gusa, urwaye, uri mw’ibohero, turaheza ntitwagutabara ?’ Azobishura rero ati : ‘Ni ukuri ndabibabwiye : ico cose mwanse kugirira umwe umwe muri abo batobato, ni je mwanse kukigirira.’
Bano rero bazotabwa mu mahano adahera, aberanda na bo binjire mu buzima budahera. »
Partager
9 MUNYONYO : IHEZAGIRWA RY’ISENGERO RY’UMUCUNGUZI I ROMA
IGISOMWA CA MBERE
Ivyo dusoma mu gitabu c’Umuhanuzi Ezekiyeli (47, 1-2. 8-9. 12)
Nabonye amazi yatemba ava mu ngoro, abo bose ayo mazi ashikiriye baca bakira
Muri irya minsi, Umumalayika yangarukanye ku muryango w’ingoro y’Umukama, nca mbona amazi ariko ariburuka ava munsi y’urwinjiriro rw’ingoro mu buseruko, kuko ingoro yari yerekeye mu buseruko nyene. Ni uko rero, ayo mazi yatemba ava i buryo bw’ingoro kandi yaca mu bumanuko bwa altari. Araheza aranjana, turarengana ikirimba cerekeye mu buraruko dukikuza urugo gushika ku kirimba cerekeye mu buseruko ; na ho nyene, amazi yariko arasohoka ava ku ruhande rw’iburyo.
Araheza ambwira ati : « Ayo mazi ariko aratemba mu buseruko, ngo amanuke mu kiyaga Araba, abone gushika mu kiyaga c’amazi y’umunyu, kugira ngo akize ayo mazi abe meza. Aho urwo ruzi ruzotembera hose, ibiri mu mazi vyose bizobona kuramba n’ukugwira. Ifi nyinshi zizosagarara kuko ayo mazi akiza ivyo vyose yinjiyemwo, ubuzima bugaseruka aho ayo mazi ashitse hose.
Ku nkombe zose z’urwo ruzi, hazomera igiti cose cama ibiribwa ; bizokwama bitotahaye kandi ntaho bizobura ivyamwa. Bizokwama ivyamwa bishasha rimwe mu kwezi, kuko bitungwa n’amazi avuye mu ngoro nyene. Ivyo vyamwa bizoba ivyokurya, amababi yavyo abe umuti wo kuvura. »
IZABURI
Icit : Uruzi rurahimbaye umurwa w’Imana ; ari wo ngoro nyeranda rwose ya Rudasumbwa.
Imana ni Yo mahungiro yacu, ni Yo magara yacu,
Ni Yo mirukiro ya minsi yose mu magorwa ;
N’aho isi yohinduka, n’aho imisozi yosenyukira mu biyaga,
Ntacodutera ubwoba.
Hari uruzi : imigende yarwo irahimbaye umurwa w’Imana,
Ari wo ngoro nyeranda ya Rudasumbwa ;
iri hagati muri wo, ikawuhagarikira,
Imana irawurarira bugaca.
Umukama, Nyen’ingabo, turi kumwe ;
ni We mahungiro yacu, we Mana ya Yakobo !
Gende, mwitegereze ibitangaza Umukama yagize,
ingene yateye amakuba kw’isi.
IGISOMWA CA KABIRI
Ivyo dusoma mw’ibaruwa rya mbere Umutumwa Paulo yandikiye Abakorenti (3, 9c-11. 16-17)
Muri ingoro y’Imana
Ncuti zanje,
Muri inyubakwa yubatswe n’Imana.Narakoresheje ya ngabirano nahawe n’Imana, ndataba nk’umwubatsi w’umuhinga. None abandi bariko barabandanya ; mugabo umwe wese niyitegereze ico yubakirako. Nta n’umwe ashobora gushiraho uwundi mugero atari uwuhasanzwe, na wo ni Yezu Kristu.
Mbega, ntimuzi ko muri ingoro y’Imana kandi ko Mutima w’Imana aba muri mwebwe ? Nihagira uwusambura ingoro y’Imana, Imana izomusambura ; kuko ingoro y’Imana ari nyeranda, kandi iyo ngoro ni mwebwe.
INKURU NZIZA
Alleluya, alleluya.
Umukama yavuze ati : « Natoye iki kibanza ndakigira ceranda,
kugira ngo izina ryanje rivyagiremwo imyaka n’imyaka. »
Alleluya.
Ivyo dusoma mu Nkuru Nziza ya Yezu Kristu nk’uko yashikirijwe na Yohani (2, 13-22)
Yezu avuga igisengero c’umubiri wiwe
Pasika y’Abayuda yari yegereje, Yezu rero aduga i Yeruzalemu. Araheza asanga mu gisengero ababunza inka, intama n’inuma, n’abavunja amafaranga bicaye. Araheza azingazinga imigozi, ayigira nk’ikibŏko, arabahinda bose abakura mu gisengero, be n’intama n’ibimasa, amafaranga y’abavunja arayasanzaza, ameza yabo arayacuranguza. Ababunga inuma na bo ababwira ati : « Kura ivyo ngaha, ingoro ya Data ntimuyigire inzu y’akaguriro ! »
Abigishwa biwe rero bibuka ko handitswe ngo : « Ukwitwararika ingoro yawe kurambakuye. »
Abayuda rero baramwishura bati : « Ko ubigenjeje gurtyo, ikimenyetso utweretse ni ikihe ? » Yezu abishura ati : « Sambure iki gisengero, nanje nze ndagihagarike mu minsi itatu. » Abayuda rero baramwishura bati : « Iki gisengero bakimazeko imyaka mirongo ine n’itandatu bacubaka, nawe ngo wogihagarika mu minsi itatu ! »
We yamara yavuga igisengero c’umubiri wiwe. Aho rero amariye kuzuka ava mu bapfuye, abigishwa biwe bibuka ko yari yabivuze ; barahava bemera Ivyanditswe, bemera n’ijambo Yezu yari yavuze.
Évangéliser les aréopages contemporains 