Accueil » Parole de Dieu (en Kirundi) (Page 110)
Archives de Catégorie: Parole de Dieu (en Kirundi)
Mes Photos sur Flickr
IBATISIMU Y’UMUKAMA
(Idominika ikurikira Epifaniya)
Umusi bahibaza Epifaniya y’Umukama ni haba ari kw’igenekerezo ry’indwi canke iry’umunani Nzero, bagira umusi mukuru w’ibatisimu y’Umukama ku musi wa mbere ukurikira iyo dominika, kandi, batarasoma Injili, batora igisomwa kimwe gusa muri vya bisomwa vyahagenewe.
Mu mwaka B no mu mwaka C, bashobora gusoma ibindi bisomwa batarasoma Injili, nk’uko vyanditswe. Kandi iyo bahejeje guhimbaza uwo musi mukuru, inyuma y’igisabisho co kuja kuryama, igihe ca Noeli kiba kirangiye.
IGISOMWA CA MBERE
Ivyo dusoma mu gitabu c’Umuhanuzi Izaya : 42, 1-4. 6-7
(Ng’uwo umusavyi wanje mfise ku mutima)
Ng’iri irivumerewe n’Umukama :
Ng’uwo umusavyi wanje nama mpagarikiye,
ng’uwo uwo nitorereye kandi mfise ku mutima.
Naramuhaye umutima wanje,
ngo aheze azanire intara ubutungane.
Ntayogora, ntavuza urwamo
Ntagenda ariyamiriza mu mayira.
Ntahohosha umubingo wavunitse,
ntazimya urumuri rukiyengera
azoshikiriza amateka nk’uko yabitumwe.
Ntazotirigana kandi ntazocika intege,
gushika ashinge amateka mu bihugu,
abari mu mazinga na bo barorere inyigisho yiwe.
Jewe Mukama, narakwihamagariye mu butungane,
ndagufata ukuboko, ndakwiremera,
narakugenye ngo unyuzurize n’igihugu canje,
ubere umuco amakungu ;
uhumure impumyi, ubohore imbohe
ukure mu mvuto abahora mu mwijima.
Izaburi 28 (29), 1-2. 3-4. 3b. 9c. 10
Icit : Imana izohezagira intara yayo, iyigabire amahoro.
Hereze Umukama, bana b’Imana,
hereze Umukama ikaze n’iteka,
hereze Umukama ikaze rikwiye izina ryiwe,
hereze Umukama mu ngoro yiwe nyeranda.
Akamo k’Umukama kasiriye ku mazi,
Umukama yasiriye ku mazi nyamwinshi ;
ijwi ry’Umukama rirakomeye,
ijwi ry’Umukama rirarenga.
Imana Nyen’inganji irasiranye ;
mu ngoro yayo hose havugwa ngo : ‘N’iganze’
Umukama yaravyagiye ngo arekure isegenya,
Umukama aravyagiye, arahangamye mu myaka yose.
IGISOMWA CA KABIRI
Ivyo dusoma mu gitabu c’Ibikorwa vy’Abatumwa : 10, 34-38
(Imana yamuvyagijemwo Mutima Mweranda)
Amaze gushika kwa Korneliyo, Petero asama ijambo ati : « Ni ivy’ukuri, ubu ndategereye ko Imana itagira nkunzi ; mu bihugu vyose, ishima uwuyubaha kandi agakora ibitunganye.
Yarungikiye Abanyisraeli Yezu Kristu, ngo abamenyeshe ijambo ry’amahoro : ni We Mukama wa bose. Murazi neza ivyabaye mu Buyudeha bwose, kuva ca gihe Yohani yigisha ibatisimu, aho Yezu w’i Nazareti atanguriye kwigisha mu Bugalile. Murazi ingene Imana yamwatiye ikamuvyagizamwo Mutima Mweranda n’inganji. Aho aciye hose, yagenda aragira neza, akabohora abari mu ngoyi za shetani ; kanatsinda yari ahagarikiwe n’Imana.»
INKURU NZIZA
Alleluia, alleluia.
Ijuru ririyugurura kandi ijwi rya Data rirumvikana,
riti : « Uyu ni Umwananje nkunda cane, anshika ku nyota. »
Alleluia.
Ivyo dusoma mu Njili Nyeranda yanditswe na Matayo : 3, 13-17
(Amaze kubatizwa, Yezu yabonye Mutima Mweranda amwururukirako)
Muri irya misi, Yezu yavuye mu Bugalile aja ku ruzi Yordani ngo abatizwe na Yohani. Yamara Yohani aramwankira, ati : « Ni jewe nari kubatizwa nawe, none uje iwanje ? » Yezu na we aramwishura ati : « Pfa kundeka muri uyu mwanya ; na none birabereye ko turangura vyose mu ngingo. » Ni uko rero Yohani aramubatiza.
Yezu amaze kubatizwa, arava mu mazi ; niho ijuru ryiyugurura, akabona Mutima w’Imana yururuka mu gisa n’inuma, amuzako. Ijwi rica ryasirana mw’ijuru, rivuga riti : « Uyu ni Umwananje nkunda cane, muri We nahasanze ibinezera vyose. »
Partager
EPIFANIYA Y’UMUKAMA
IGISOMWA CA MBERE
ivyo dusoma mu gitabu c’Umuhanuzi Izaya : 60, 1-6
(Ubuninahazwa bw’Umukama bwagusaze wese)
Yeruzalemu we, haguruka, tamanzura : umuco wawe waserutse,
ubuninahazwa bw’Umukama bwagusaze.
Nayo umwijima watwikiriye isi,
umuzimiza wajimije igihugu ;
ariko weho Umukama yakugarukiye,
ubuninahazwa bwiwe buhagaze hejuru yawe.
Intara ziza zigana umuco wawe,
abami na bo birukira izuba rirasiye iwawe.
Tereza amaso irya n’ino urabe :
bose bakoranye kandi baje iwawe ;
abahungu bawe baje bava kure,
abigeme bawe na bo baje bareruwe.
Niwabibona uzoheza unezerwe,
agahimbare kakwuzure,
kuko ivyiza biva hakurya y’ibiyaga bizosesekara iwawe,
amatungo y’ibihugu azotaha iwawe.
Isinzi ry’ingamiya n’ibitwazi vya Madiyani na Efu
Bizokubita iwawe hazime.
Abo muri Seba bose bazoba bazanye inzahabu n’isenga
Baninahaza Umukama.
Izaburi 71 (72), 1-2. 7-8. 10-11. 12-13
Icit : Ibihugu vyose bizokuyoboka, Mukama !
Mukama, shikiriza umwami intahe,
ronsa ubutungane umwana w’umwami ;
maze, acire urutunganye abana biwe,
ashingire ingingo abatobato bawe.
Niho rero ubutungane buzokwiserura,
amahoro na yo akamaho imyaka yose ;
azotwara intara kuva ku kiyaga gushika ku kindi,
akure ku ruzi ashikane ku mpera y’isi.
Abami b’i Tarsi n’abo mu mazinga bazomuha ingorore,
abami b’i Saba na Seba bazomutura ishikanwa ;
abami bose bazokubita ibipfukamiro imbere yiwe,
n’ibihugu vyose bizomuyoboka.
Ni we azokiza umukene amutabaza,
agakiza umuntu atagira uwiwe ;
ni we azobabara umugorwa n’umukene,
akamukiriza amagara.
IGISOMWA CA KABIRI
Ivyo dusoma mw’ibaruwa Umutumwa Paulo yandikiye Abanyefezi : 3, 2-3a. 5-6
(N’abapagani bemerwe gutorana hamwe natwe iragi ry’Umukama)
Ncuti zanje,
Ngira ngo mwarumvise ingene Imana yanteye iteka kubera mwebwe, ikampishurira rya Banga rya Kristu ritamenyeshejwe aba kera, nk’uko ubu ryahishuriwe abatumwa n’abahanuzi biwe beranda muri Mutima. Ubu n’abapagani baremerewe gutorana hamwe natwe iragi ry’Umukama, ubu turi ingingo z’umubiri umwe, dusangiye umuhango umwe muri Kristu Yezu, kubera Inkuru Nziza dusangiye.
INKURU NZIZA
Alleluia, alleluia.
Twabonye inyenyeri yiwe iserutse,
duca turaza, tuzanye n’amashikanwa,
ngo dusenge Umukama.
Alleluia.
Ivyo dusoma mu Njili Nyeranda yanditswe na Matayo : 2, 1-12
(Tuvuye mu Buseruko ngo tuze gusenga Umwami yavutse)
Aho Yezu yavukira i Betelehemu mu Buyudeha ku ngoma y’umwami Herodi, Abamajusi bashitse i Yeruzalemu bavuye mu buseruko bw’izuba, bavuga bati : « Umwami w’Abayahudi aherutse kuvuka ari hehe ? Twabonye inyenyeri yiwe iserutse, duca tuza kumusenga. »
Umwami Herodi avyumvise bimutera akoba, we n’ab’i Yeruzalemu bose. Akoranya rero abakuru mu basaserdoti n’abigisha bose, ababaza iyo Kristu azovukira. Na bo bamwishura bati : « Ni i Betelehemu mu Buyudeha, kuko ariho umuhanuzi yavuze aho yandika ati : Ewe Betelehemu ya Yuda, nturi muto mu miryango ya Bene Yuda, kuko umwami azorongora igihugu canje Israeli azova iwawe. »
Araheza Herodi yihereranya bano Bamajusi, baramufoborera neza ikiringo c’aho iyo nyenyeri yababonekera ; arabagenekereza Betelehemu, ababwira ati : « Gende, mubaririkize neza ivy’uyo mwana ; muramutse mumubonye, muntumeko, nanje ngende kumusenga. »
Bahejeje gukebukana n’umwami, barijura. Ya nyenyeri bari babonye mu buseruko ibatanga imbere iragenda ; ishitse hejuru y’aho nya mwana yari ari, irahagarara. Ngo babone nya nyenyeri, barahimbarwa cane. Binjiye mu nzu, bahasanga nya mwana na Mariya nyina wiwe, barapfukama, baramusenga. Baraheza bafundurura ibikemanyi vyabo, bamushikanira inzahabu, isenga n’imira.
Ivyo biheze, baburirwa mu ndoto ngo ntibasubire guca kwa Herodi, baca bajana iyindi nzira, bitahira iwabo.
Partager
IDOMINIKA YA 34 YO MU MWAKA.
UMUSI MUKURU WA KRISTU MWAMI
IGISOMWA CA MBERE
Ivyo dusoma mu gitabu ca kabiri ca Samuweli : 5, 1-3
(Basīga Dawudi ngo abe umwami w’Israeli)
LE ROI DAVID ; Salon : Chambre de Louis XIV, Appartement du roi Emplacement : paroi ; (Photo credit: Wikipedia)
Umusi umwe, imiryango yose y’Israeli yaroye i Hebroni kwa Dawudi, imubarira iti : « Raba, twe na wewe dusangiye amaraso ! Na kera nyene, Sauli akiri ku ngoma, ni wewe wajana inteko z’Abanyisraeli ; kandi ni wewe Umukama yabwiye ati : ‘Uzoba umwungere w’Israeli, igihugu canje, kandi uzoba umukuru w’Israeli. » Uko ni ko abashingantahe bose b’Israeli bashengereye umwami i Hebroni ; ni uko rero bagiriranira amasezerano imbere y’Umukama i Hebroni nyene. Baraheza baramusīga amavuta ngo bamwimike ngo abe umwami w’Israeli.
Izaburi 121 (122), 1-2. 4-5
Icit : Ingo, tudugane akanyamuneza mu ngoro y’Umukama.
Ese akanyamuneza narimwo aho bambwira,
bati : « Tuje mu ngoro y’Umukama ! »
Ubu noneho, turiko turashika
Mu birimba vyawe, Yeruzalemu.
Ni ho ibisata vy’Israeli biduga,
ari vyo bisata vy’Umukama.
Ni ho Israeli yashinzwe ibanga
Ry’ugushemeza izina ry’Umukama,
kuko ari ho havyagiye ubutungane,
hakaba inzu ya Dawudi.
IGISOMWA CA KABIRI
Ivyo dusoma mw’ibaruwa Umutumwa Paulo yandikiye Abakolosi : 1, 12-20
(Imana yadushize mu Bwami bw’Umwana wayo ikunda cane)
Ncuti zanje,
Nimukengurukire Imana Data, Yo yaduhaye amagara y’ugusangira mu muco iragi ry’aberanda.
Ni Yo yadukuye mu muzimagiza, idushira mu Bwami bw’Umwana wayo ikunda cane, We twaronsemwo urukiza n’ikigongwe c’ibicumuro.
Ni We gashusho k’Imana itaboneka,
Ni We yaboneye izuba zina kiremwa cose,
Kuko muri We ari ho vyose vyaremewe,
ivy’ijuru n’ivyo kw’isi, ibiboneka n’ibitaboneka,
yaba Abashingwantebe canke ingabo
canke Inkomezi canke Intwaza z’ijuru :
vyose ni We yabiremye kandi ni We maherezo ya vyose.
Yamye ariho vyose bitarahaba kandi vyose bibeshwaho muri We.
Ni We kandi Mutwe w’Umubiri wiwe ari wo Ekleziya.
Ni We vyose vyamukako, ni We mfura y’abapfuye,
Kugira ngo abe uwa mbere muri vyose,
kuko Imana yashimye ko umusesekara wayo wose
uvyagira muri Kristu,
igashima ko kubwiwe vyose bisubira kwuzura na Yo,
ari ivyo kw’isi, ari ivyo mw’ijuru,
igihe yazana amahoro kubw’amaraso yasheshe ku musaraba.
INKURU NZIZA
Alleluya, alleluya.
Iragahezagirwa ingoma ya sokuru wacu Dawudi,
ari yo ngoma y’ibihe bishasha !
N’ahezagirwe uwuje kw’izina ry’Umukama !
Alleluya.
Ivyo dusoma mu Njili Nyeranda yanditswe na Luka : 23, 35-43
(Umwami yihebeye igihugu ciwe)
Bamaze kubamba Yezu, igihugu cari aho kirorera, abakuru na bo baramutwengera mw’ijigo, bati : « Yakijije abandi, niyikize we nyene, niyaba ari Kristu w’Imana, Intore yayo ! » Abasirikare baramutwenga na bo nyene, baregera ngo bamuhereze isiki, bamubarira bati : « Niwaba uri umwami w’abayahudi, niwikize wewe nyene!» Hejuru yiwe kandi hari urwandiko ngo : « Uyu ni umwami w’Abayahudi. »
Umwe muri nya babisha bari babambanywe na we aramutuka ati : « Mbega, uri Kristu ? Niwikize wewe nyene, udukize natwe ! » Ariko, aramwishura amukankamira, ati : « Ntumenya kwubaha Imana, wewe upfuye rumwe na we ! Tweho tuzize ikiri ukuri, tuzize ico twakoze ; ariko uyu we, nta kibi namba yakoze. » Araheza abarira Yezu ati : « Yezu, uranyibuka aho uzogira mu Bwami bwawe ! » Yezu aramwishura ati : « Ndakubariye ivy’ukuri : uyu munsi tuza kuba turi kumwe mw’Iparadizo ! »
Évangéliser les aréopages contemporains 