Accueil » Parole de Dieu (en Kirundi) (Page 80)
Archives de Catégorie: Parole de Dieu (en Kirundi)
Mes Photos sur Flickr
Igihe c’Ikarema: Idominika ya 1 (Umwâka C)
IGISOMWA CA MBERE
Ivyo dusoma mu gitabu c’Ukwibutsa Amategeko (26, 4-10)
Ukwemera kw’igihugu c’Imana Israyeli
Musa yabwiye ishengero ry’Abanyisrayeli ati « Niwahereza ivyimburwa vya mbere, umuherezankuka azokwakira igisimbo birimwo, agitereke ku ruhimbi rw’Umukama Imana yawe. Hanyuma uvuge imbere y’Umukama Imana yawe, uti: « Sokuru yari Umwaramu w’umwangazi, yamanutse mu gihugu ca Misiri, ihahungira ari kumwe n’abantu imparurwa ; ntiyari bwarondoke gushika aho abiwe bǎsagarara, bakaba igihugu gikomeye. Hanyuma Abanyamisiri baraheza baducura bufuni na buhoro, baratugirira nabi, batugira abaja. Niho twatakambira Umukama Imana ya basokuru, Umukama araheza adutega yompi, aribonera ayo tugowe, amaganya yacu n’agahahazo batwicisha. Umukama aca aramvura ukuboko kwiwe rubashavyose, adukura mu Misiri, akora ibitangaza vyinshi n’ibimenyetso biteye ubwoba. Yaratuzanye gushika aha, atugabira iki gihugu gitembamwo amata n’ubuki. None rero, Mukama, ndagushikaniye umwaka w’ivyo nimbuye mw’itongo wampaye.’
Hanyuma uheze ubitereke imbere y’Imana yawe, ukubite ibipfukamiro imbere y’Umukama Imana yawe. »
IZABURI 90 (91) 1-2, 10-11, 12-13, 14-15
Icit. : Mukama, guma iwanje,
ndi mu marushwa.
Iyo nkingiwe n’inkinzo y’Uwahangamye mw’Ijuru,
nkibera mw’irebe ry’Umushoboravyose,
ndibuka Umukama ari we mahungiro n’amirukiro yanje,
Imana yanje nizeye.
Nta kabi kazokugobako,
nta muvumo uzogera mu nzu yawe ;
na none yabwirije abamarayika biwe,
ngo baguhagarikire mu rugendo rwawe rwose.
Bazokurerura mu maboko yabo,
ngo ntutsitare kw’ibuye.
Uzokandagira imamba n’akamina,
uhonyore umukurira w’intare be n’isato.
« Nzomukimbagiza ko yanyishimikije,
nzomukuza kw’atiyobagije izina ryanje.
Aranyakura nkamwitaba,
mu marushwa sindamuvirira :
ndamuruhura nkamuninahaza. »
IGISOMWA CA KABIRI
Ivyo dusoma mw’Ikete Umutumwa Pawulo yandikiye Abanyaroma (10, 8-13)
Ukwemera muri Yezu Kristu
Ncuti zanje,
Mu Bitabu Vyeranda handitswe ngo: « Ijambo riri hafi yawe rwose, riri mu kanwa kawe no mu mushaha wawe. » Iryo Jambo, ni ya Nkuru nziza y’ukwemera duhora tubigisha. Nka ko, niwaba wemeza n’umunwa wawe ko Yezu ari Umukama, ukemera mu mushaha wawe yuko Imana yamuzuye mu bapfuye, uzokira. Kuko uwemera n’umushaha wiwe wose aca aba intungane, na we uwubiserura mu mvugo aba ashikiriye ubukiriro.
Kukaba nka ko, Ibitabu bivuga ngo: « Ku musi w’urubanza, nta n’umwe mu bamwemera azoteterwa.» Nta gitandukanya Umuyuda n’Umugereki kiriho : bose basangiye Umukama umwe, we agabira abamwambaza bose. Handitswe kandi ngo : « Umuntu wese yambaza izina ry’Umukama, azokira. »
INKURU NZIZA
Ijambo ryawe ni ukuri, Mukama,
itegeko ryawe na ryo ni ubukiriro.
Umuntu ntatungwa n’indya gusa,
ariko aratungwa n’ijambo ryose riva mu kanwa k’Imana.
Ijambo ryawe ni ukuri, Mukama,
itegeko ryawe na ryo ni ubukiriro.
Ivyo dusoma mu Nkuru nziza ya Yezu Kristu nk’uko yashikirijwe na Luka (4, 1-13)
Mutima amujana mu gahinga, araheza arageragezwa na shetani
Yezu yuzuye Mutima Mweranda ava kuri Yorodani, Mutima amujana mu gahinga, ahamara imisi mirongo ine ageragezwa na Shetani. Muri iyo misi, nta co yageza ku munwa ; ngo ize guhera, arasonza. Shetani imubwira iti : « Niwaba uri Umwana w’Imana, bwiriza iri buye ricike umukate. » Yezu ayishura ati : « Handitswe ngo : Umuntu ntatungwa n’indya gusa.» Shetani yongera yongera kumujana ku gasozi karekare, imwereka intara zose z’abami b’isi, imubwira iti : « Ndaguhereza ubwo bubasha bwose n’ubuninahazwa bwaho bwose, kuko nabuhawe ndabuhereza uwo nshatse ; niwapfukama imbere yanje, buzoba rwawe bwose. » Yezu mu kuyishura ayibwira ati: « Handitswe ngo : Uzosenga Umukama Imana yawe, uyikorere yo nsa. » Shetani yongera kumujana i Yeruzalemu, imutereka kw’isunzu ry’igisengero, imubwira iti: « Niwaba uri Umwana w’Imana, niwikororere hasi, kuko handitswe ngo : ‘Azotegeka abamarayika biwe ngo bakurinde.’ Kandi ngo : Bazoguterura mu minwe yabo, woye gutsitaza ikirenge kw’ibuye. » Yezu mu kuyishura ayibwira ati : « Handitswe ngo: Ntuze ugerageze Umukama Imana yawe.»
Irangije kumugerageza mu buryo bwose, shetani imuva iruhande gushika igihe cagenwe.
Partager
IDOMINIKA YA 2 YO MU MWAKA (Umwâka C)
IGISOMWA CA MBERE
Ivyo dusoma mu gitabu c’Umuhanuzi Izaya (62, 1-5)
Urukundo rw’Imana ku gihugu ciwe
Sinzoreka guhayagiza Siyoni,
sinzohengeshanya gushimagiza Yeruzalemu,
gushika ubutungane bwabo butamanzure nk’umutwenzi,
urukiza rwaho ruce ibibatsi nk’urumuri.
Intara zizoheza zibone ubutungane bwawe,
abami bose babone ubuninahazwa bwawe.
Bazogutazira izina rishasha
rivuye mu kanwa k’Umukama.
Mu minwe y’Umukama uzoba urugori rukayangana,
mu kiganza c’lmana uzoca ibibatsi nk’urugori rw’abami.
Ntibazoba bakikwita « Intabwa »,
intara yawe ntizoba icitwa « Akarere »,
bazoguhamagara riho « Kinezero canje »,
intara yawe bayite « Inkundwakazi »
kuko uhimbara Umukama,
intara yawe kandi izoronka umunega.
Nk’uko umusore yabîra umwigeme,
ni ko umuremyi wawe azokwǎbīra ;
nka kurya umukenyezi anezera umugabo wiwe,
ni ko nawe uzonezera Imana.
IZABURI 95 (96) 1-2a, 2b-3, 7-8a, 9a.10ac
Icit. : Nimugende mumenyeshe isi yose
ivyiza vy’agatangaza Imana yakoze !
Vyinira Umukama akavyino gashasha,
nawe si iyo uva ukagera, vyinira Umukama,
vyinira Umukama, izina ryiwe rihezagirwe.
Uko bukeye uko bwije, nimumenyeshe urukiza rwiwe,
mwiganire abapagani ko ari we aninahaye,
mumenyeshe ibihugu vyose ivyiza vy’agatangaza yakoze.
Hereze Umukama, mwa miryango y’intara,
hereze Umukama ikaze n’iteka,
hereze Umukama ikaze rikwiye izina ryiwe.
Senga Umukama arangwa n’ubweranda :
nawe, wa si, hinda agashitsi mu nyonga ziwe,
cire agace abapagani muti : « Umukama ari ku ngoma ! »
ni we aca urubanza akurikije ubutungane.
IGISOMWA CA KABIRI
Ivyo dusoma mw’Ikete rya mbere Umutumwa Pawulo yandikiye Abanyakorenti (12, 4-11)
Mutima ni we agaba ingabirano ziwe
Ncuti zanje,
Hariho ubwoko bwinshi bw’ingabirano, mugabo Mutima akaba umwe ; hariho ubwoko bwinshi bw’imyuga, mugabo Umukama akaba umwe ; hariho ubwoko bwinshi bw’ibikorwa, mugabo Imana Yo itunganya vyose muri bose ni imwe nsa. Umwe wese ahabwa na Mutima ingabirano, kugira ngo igirire akamaro bose. Umwe ahabwa na Mutima ingabirano y’ukwigisha ubwitonzi bw’Imana, uwundi iy’ukwigisha ubumenyi bw’Imana ku bw’uyo Mutima nyene, uwundi ingabirano y’ukwemera muri uyo Mutima nyene, uwundi iy’ugukiza muri uyo Mutima nyene, uwundi iy’ugukora ibitangaro, uwundi iy’uguhanura kw’izina ry’Imana uwundi iy’ugutahuza ibivuye kuri Mutima, uwundi iy’ukuvuga indimi, uwundi iy’ukuzisobanura. Ariko, ivyo vyose bigirwa na Mutima umwe rudende agabira umwe wese nk’uko abishaka.
INKURU NZIZA
Aleluya, alleluya.
Imana yaduhamagaye kubera inkuru nziza, kugira ngo tubashe gushikira
ubuninahazwa bw’Umukama wacu Yezu Kristu.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Yohani (2, 1-11)
Ikimenyetso ca mbere ca Yezu i Kana
Umusi umwe, habaye ubugeni i Kana mu Bugalile na we nyina wa Yezu ni ho yari ari. Yezu na we nyene yari yatumiwe muri ubwo bugeni, hamwe n’abigishwa biwe. Umuvinyu ngo uze guhera, nyina wa Yezu aramubarira ati : « Erega, nta muvinyu bagifise. » Yezu na we amwishura ati : « Mbega Mupfasoni, twe nawe tubisinzikayeko iki ? Igihe canje ntikiragera. » Araheza nyina wiwe abwira abasuku ati : « Ico aza kubabwira cose, muragikora. »
Hakaba hari haterekanze intango zitandatu zabajwe mu mabuye Abayuda biyuhagiriramwo : imw’imwe yuzuzwa n’impange zibiri canke zitatu. Yezu abarira ba basuku ati : « Nimwuzuze amazi izo ntango. » Barazuzuza no hejuru. Araheza Yezu ababarira ati « Nimudahe rero mushire umuteretsi. » Baramushira. Nya muteretsi ngo yumvirize nya mazi yahindutse umuvinyu, ahamagara nyenukurongora kuko atari azi iyo nya muvinyu uvuye, — vyari bizwi na nya basuku bene kuvoma, — aramubarira ati : « Abandi bahora babanza gutereka umuvinyu uryoshe, bamara guhimba bakawuhiriza uwutanganya n’uwa mbere kuryoha, yamara weho wabanje kwirengagiza uwuryoshe, none uwuzanye ubu. »
Ico ni co kimenyetso Yezu yatanguriyeko, agikorera i Kana mu Bugalile. Ukwo ni ko Yezu yerekanye ubuninahazwa bwiwe, abigishwa biwe baca baramwemera.
Partager
Igihe ca Noheli: IBATISIMU Y’UMUKAMA (Umwaka C)
Umusi bahimbaza Epifaniya y’Umukama ni haba ari kw’igenekerezo ry’indwi canke iry’umunani Nzero, bagira umusi mukuru w’Ibatisimu y’Umukama ku musi wa mbere ukurikira iyo dominika, kandi, batarasoma Inkuru Nziza, batora igisomwa kimwe gusa muri vya bisomwa vyahagenewe.
Mu mwaka B no mu mwaka C, bashobora gusoma ibindi bisomwa batarasoma Inkuru Nziza, nk’uko vyanditswe. Kandi iyo bahejeje guhimbaza uwo musi mukuru, inyuma y’igisabisho co kuja kuryama, igihe ca Noheli kiba kirangiye.
Ng’ibi ibisomwa bashobora gusoma mu mwaka C. Inkuru nziza yo ntihinduka, ni iyo nyene yategekanijwe, mu gihe igisomwa ca mbere n’ica kabiri bashobora gufata bimwe twandika mu mwaka A.
IGISOMWA CA MBERE
Ivyo dusoma mu gitabu c’Umuhanuzi Izaya (40, 1-5. 9-11)
Ubuninahazwa bw’Umukama buzokwihonekeza, kandi kandi nta wuzosigara atabubonye
Humurize, humurize igihugu canje. Nimusubirize umutima mu nda Abanyayeruzalemu. Babwire muti : « Igikorwa canyu kirarangiye, igicumuro canyu carishuwe. Umukama yarabahanye ikirenga kabiri ku bicumuro vyanyu. » Ijwi risemerera riti : « Nimuharurire Umukama inzira mu gahinga, muharurire Imana yacu inzira igororotse mw’idonzi. Umubande wose ufurirwe, umusozi n’umutumba wose biringanizwe, ahari imanga hose hongere hasaswe, na ho ahaduga nk’uruti rw’icumu haringanizwe. Niho ubuninahazwa bw’Umukama buzokwihonekeza, kandi nta wuzosigara atabubonye, kuko Umukama yarivumereye. »
Wewe uzaniye Siyoni inkuru nziza, duga ku musozi muremure. Wewe uzaniye Yeruzalemu inkuru nziza, semerera n’ijwi rirenga. Tereza akamo ntutinye. Ubwire ibisagara vya Yuda, uti : « Ng’iyo Imana yanyu ! Ng’uyo Umukama Imana, azananye n’ububasha, ukuboko kwiwe kuzomugarurira vyose. Raba, aje yitegekanije ivyo yatsindiye vyose. Na yo impera yiwe yamutanze imbere. Azoragira ubusho bwiwe nk’umwungere, azoterurira imyagazi mu maboko yiwe ayifumbatire ku gikiriza ciwe, intama zonsa na zo azozibungabunga.
IZABURI 103 (104) 1b-2, 3-4, 24-25, 27-28, 29-30
Icit. : Ninahaza Umukama, se mushaha wanje
kuko ari mukuru cane.
Ninahaza Umukama, se mushaha wanje !
Mukama Mana yanie, uri mukuru cane !
Ubukuru n’ubwiza bibarizwa iwawe,
umuco uwikwiza uk’igikwemu.
Umukama yashinze umurwa wiwe kw’ijuru (y’amazi yo hejuru),
ibicu bikamubera inderuzo
agendera ku mababa y’umuyaga.
Imiyaga ayigira irtumwa ziwe,
amasase y’umuriro akayagira abasuku.
Ivyiza wakoze ni isinzi, Mukama,
kandi wabigiranye ubuhinga,
isi ihinda itunga ryawe.
Raba ikiyaga amahero, ibikoko indiri n’indiri
bikivogeramwo, ibinini n’ibitoyi.
Bose barindiriye
ko wobakora mu minwe igihe kigeze ;
urabibaha, bakavyakiriza yompi,
uragaranzura ibiganza, bagahazwa n’ivyiza vyawe.
Winyegeje, igihumura gica kibica,
baca barumara bagasubira mw’ivu.
Ubasubije agatima, ng’abo barakomeye
kandi ugaca uhindura isi.
IGISOMWA CA KABIRI
Ivyo dusoma mw’Ikete Umutumwa Pawulo yandikiye Tito (2, 11-14; 3, 4-7)
Imana iradukiriza mu mazi yatwuhagiye akabi kose tugasubira kuba bazima muri Mutima Mweranda
Mukunzi wanje, Urukundo Imana yadukunze, sôko ry’ubukiriro bw’abantu hose, rwibonekeje mu bantu. Rutwibutsa guheba akabi kose no guhunga ibihenda amaso vyose, kugira ngo ubuzima bwa hano kw’isi tubukoreshe twigerera, tube intungane twongere tuyoboke Umuremyi. Ivyo vyose tubigire turorereye bwa buhirwe twizigiye na bwa buninahazwa bw’Imana yacu nzima n’ubw’Umukiza wacu Yezu Kristu, We yatwihebeye ngo adukize akabi kose, atyorore igihugu kimwegukiye, cama citwararika ineza.
Umusi Imana Mukiza wacu yerekana impuhwe n’urukundo ifitiye abantu, ntiyiriwe irihweza ibikorwa vy’ubutungane twari twakoze. Imbabazi zayo zonyene ni zo zatumye idukiza mu mazi yatwuhagiye akabi kose kari karatuzingamitse, tugasubira kuba bazima muri Mutima Mweranda. Uwo Mutima Mweranda, yamutuvyagijemwo ku bwa Yezu Kristu Umukiza wacu, kugira ngo, amaze kutugira intungane, tube abaragwa b’ubuzima bwamaho twizigiye.
INKURU NZIZA
Aleluya, Aleluya.
Yohani yavuze ati : « Haje uwundusha ububasha ;
ni we azobabatiza muri Mutima Mweranda n’umuriro. »
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (3, 15-16. 21-22)
Yezu amaze kubatizwa igihe yariko arasenga, ijuru ririyugurura 
Abantu baje kwa Yohani ngo babatizwe bari biteze ikintu kandi baguma bibaza mu mitima yabo ko Yohani atari we Kristu. Yohani araheza ababwira hose ati : « Jewe mbatirisha amazi, ariko haje uwundusha ububasha sinkwiye n’ugupfundurura ibirato vyiwe, azobabatiza muri Mutima Mweranda n’umuriro. »
Ishengero ryose rimaze kubatizwa. Na Yezu nyene amaze kubatizwa, ariko arasenga, ijuru ririyugurura ; maze Mutima Mweranda aramwururukirako yibonekeje mu gisa n’inuma ; ijwi na ryo riva mw’ijuru riti : « Uri Umwananje, Jewe uyu munsi nakwivyariye. »
Évangéliser les aréopages contemporains 