IGISOMWA CA MBERE

Ivyo dusoma mu gitabu c’Imigani (31, 10-13. 19-20. 30-31)

Umukenyezi yitonda aba ari n’agaciro

Ni nde azoronka umukenyezi atagira akanenge ? Ibimuciye biruta na kure ibiciye intabonwa nziza cane. Umunega wiwe yama amwishimiye, amuzeyeko ivyiza vyinshi. Imisi yose babana, ni we gahimbare kiwe, nta magorwa azomutera. Arajisha, agatāka, eka arabangutse mu bikorwa. Yamana inyuzi mu ntoke, intoke ziwe ziraberereye. Aboro abakiriza yompi, agatabara abakene.
Ugushaza kurahenda, ubutore bw’umubiri na bwo ntaco bumaze ; umukenyezi akwiye gushemezwa, ni urya yubaha Umukama. Muramuronsa igice c’ivyo yakoreye ; ibikorwa vyiwe na vyo bimurange mu marembo y’igisagara.

IZABURI 127 (128), 1-2. 3. 4-5

Icit : Hahiriwe umuntu wese yubaha Umukama.

Hahiriwe umuntu wese yubaha Umukama,
akagendera mu nzira yiwe !
Uzotungwa n’ibikorwa vy’amaboko yawe,
uzohirwa, uzonezerwa !

Umugore wawe azoba nk’ingundu y’ibitoke vyama cane,
ari ikare mu nzu yawe ;
abana bawe bazoba nk’amashami akikije ingundu,
bakikije ameza yawe.

Ng’ivyo ivyiza bizogirirwa umuntu yubaha Umukama.
Umukama ari kuri Siyoni n’aguhezagire,
ubone Yeruzalemu iroraniwe
mu misi yose y’ubuzima bwawe.

IGISOMWA CA KABIRI

Ivyo dusoma mw’ibaruwa rya mbere Umutumwa Paulo yandikiye Abanyatesalonika (5, 1-6)

Umusi w’Umukama ntububire nk’igisuma

Ncuti zanje,
Ivyerekeye igihe n’isango vy’amaza y’Umukama, ntimukeneye ko ndabibandikira. Namwe nyene murazi neza ko umusi w’Umukama uzoza nk’igisuma mw’ijoro. Aho bazoba bavuga bati : « Hari amahoro, nta nkomanzi ! », ni ho ya makuba azobarwako giturumbuka, nka kurya imbanyi ifata umukenyezi yibungenze, kandi ntazobasiga.
Ariko, mweho, benewacu, ntimuri mu muzimagiza ngo uwo musi ububire nk’igisuma ; kuko mwese muri abana b’umuco n’abana b’umutaga : ntimuri ab’ijoro canke ab’umwijima. None rero, ntidusinzire nka ba bandi, ariko nitwame tugavye kandi nitwigerere.

INKURU NZIZA

Alleluia, alleluia.

Umukama yavuze ati : « Nimugume muri jewe, nanje nzoguma muri mwebwe ;
uwuguma muri jewe ni we yama vyinshi. »

Alleluia.

Ivyo dusoma mu Nkuru Nziza yanditswe na Matayo (25, 14-30)

Igisomwa kigufi : 25, 14-15. 19-21

Washirutse ubute mu bitobito ; ingo unezerwe hamwe na shobuja

Muri irya misi,
Yezu yaciriye abigishwa biwe uyu mugani ati : « Ibizoba mu gihe Umwana w’umuntu azozira, ni nk’ivy’umuntu yagira ngo amare urubanza, agahamagara abasuku biwe akabasigarana ibintu vyiwe. Uwa mbere amuha itarenta zitanu, uwa kabiri amuha zibiri, uwa gatatu imwe ; eka umwe umwe wese ico bikwiranye. Aca aragenda.

Igisomwa kigufi kiba kiragarukiye aha

Umwe yaronse zitanu aragenda, aracuruza yunguka izindi zitanu. N’umwe yaronse zibiri agira kuno nyene, yunguka izindi zibiri. Uwari yaronse imwe na we aragenda, yimba ikinogo, azikamwo itarenta ya shebuja.

Igisomwa kigufi kibandaniriza aha

Imisi ihaciye, shebuja wa ba basuku aragaruka, abaza umwe umwe ingene yakoresheje ibintu vyiwe. Noneho, uwari yaronse itarenta zitanu araza, amuhereza izindi zitanu, ati : ‘Muhanyi, wari wansigaranye itarenta zitanu, ng’izi izindi zitanu nungutse.’ Shebuja aramubwira ati : ‘Ni vyiza, uri umusuku w’umutima ; ko washirutse ubute mu bitobito, nzogushinga n’ibiruta ivyo : ingo, unezerwe hamwe na shobuja.’

Igisomwa kigufi giherera aha

Umwe yaronse itarenta zibiri na we araza ati : ‘Muhanyi, wari wansigaranye itarenta zibiri, ng’izi izindi zibiri nungutse.’ Shebuja aramubarira ati : ‘Ni vyiza, uri umusuku w’umutima ; ko washirutse ubute mu bitobito, nzogushinga n’ibiruta ivyo : ingo, unezerwe hamwe na shobuja.’ Umwe yaronse itarenta imwe na we araza ati : ‘Muhanyi, ndazi ko uhambara, ugesa ivyo utabivye, wimbura ivyo utarimye. Nagize ubwoba, mpisha itarenta yawe mu kuzimu : ng’ibi ivyawe.’ Shebuja aramwishura ati : ‘Musuku mubi, wa kinebwe we, wari uzi ko ngesa ivyo ntabivye, nkimbura ivyo ntarimye. Uba washiriye ivyanje abadandaza, ngo ngarutse ndonke ivyanje, ndonkane n’inyungu. Nimumwake itarenta yari yaronse, muyihe uwufise cumi.
Uwutunze bazomwongerereza atunge ibiruta ; na we uwutaco afise, bazomwaka n’ico yagira ngo arafise. Nayo iyo mburakimazi, nimumute hanze mu mwijima, ni ho amarira abarizwa, ni ho bakomaniriza amenyo. »

IGISOMWA CA MBERE

Ivyo dusoma mu gitabu c’Ubwitonzi (6, 12-16)

Abarondera ubwitonzi baraburonka

Ubwitonzi burasayangana kandi ntibutituka. Ababukunda barabutangarira bitabagoye na gato ; ababurondera baraburonka. Ababurondera burabiyegereza, bukaba ari bwo butangura kubiyereka. Uwutanguranwa n’umutwenzi mu kuburondera arahiriwe, kuko azobusanga kw’irembo. Uwubukurikirana ni incabwenge, kandi uwubuteramira ntazoteba gutunganirwa. Bwo nyene bukwira imirambi burondera ababubereye, bukabiyerekana akamwemwe mu mayira kandi bugategera ivyipfuzo vyabo vyose.

IZABURI 62 (63), 2. 3-4. 5-6. 7-8

Icit : Umutima wanje urakunyotewe,
         Mukama, Mana mfise.

Mukama, ni Wewe Mana yanje,
Mpora ndondera kuva mu gitondo ca kare ;
umutima wanje urakunyotewe.
Nanje ndakwipfuza,
muri iyi si yase imigaga itagira n’ikinyotera.

Ni ko, narakubonye mu ngoro yawe,
ndihweza ububasha n’ubuninahazwa bwawe ;
niho urukundo rwawe rwandutira amagara,
ngashobora kugushimagiza!

Ni ko, nzoguma nguhezagira umwanya nkiriho,
nzokwayira iminwe izina ryawe ;
niho nzohimba nk’uwagaburiwe imisoso n’ibinure,
nzoguhaya mpimbarwe n’ukuguhoza mu kanwa.

Aho ndyamye, ninaba nibuka izina ryawe,
mara ijoro ryose nkwiyumvira,
kuko waje kuntabara :
nanje nakuvugirije impundu ndi mu mutamana wawe.

IGISOMWA CA KABIRI

Ivyo dusoma mw’ikete rya mbere Umutumwa Pawulo yandikiye Abanyatesalonika (4, 13-18)

Igisomwa kigufi : 4, 13-14

Abasinziriye muri Kristu, Imana izobashikana iwayo

Ntidushaka, benewacu, ko muyoberwa ivyerekeye abahisi bacu ; ntimwicwe n’intuntu nk’abandi batagira ukwizigira. Uko twemera ko Yezu yapfuye hanyuma akazuka, ni ko twemera ko abasinziriye muri Kristu, Imana izobashikana iwayo.

Igisomwa kigufi giherera aha

Ng’iki rero ico dushaka kubabwira kw’izina ry’Umukama : twebwe bazima, twebwe tuzoba tukiriho mu gihe c’amaza y’Umukama, ntituzotanga abazoba basinziriye ; kuko ijwi ry’umumarayika mukuru n’inzamba y’Imana bimaze gutanga ikimenyetso, Umukama We nyene azomanuka ava mw’ijuru, abapfuye muri Kristu batange abandi kuzuka ; hanyuma, twebwe bazima, twebwe tuzoba tukiriho, tuzokoranirizwa hamwe na bo, tujanwe mu bicu gusanganira Umukama mu kirere ; hanyuma twamane n’Umukama mu myaka yose. Ni uko rero, nimuhumurizanye muri ayo majambo.

INKURU NZIZA

Alleluia, alleluia.

Nimwame mugavye kandi mwiteguye :
kuko mutazi umusi Umwana w’umuntu azozirako.

Alleluia.

Ivyo dusoma mu Nkuru Nziza yanditswe na Matayo (25, 1-13)

Ng’uyu umukwe arashitse

Umusi umwe,
Yezu yaciriye abigishwa biwe uyu mugani, ati : « Ubwami bw’ijuru buzogereranywa n’abakobwa cumi bafashe amatara baja gusanganira umukwe. Batanu muri bo bari ibijuju, abandi batanu incabwenge. Bano batanu rero b’ibijuju bafata amatara ntibatwarana n’amavuta ; bano b’incabwenge mu gufata amatara, batwarana n’amavuta mu ducupa. Umugeni atevye, bose batangura gutura ingiga, hanyuma barasinzira. Mw’ijoro hagati, bumva urwamo ngo : ‘Ng’uyu umugeni arashitse : ingo mumusanganire.’

Ba bigeme bose baravyuka, bacana amatara yabo. Bamwe batanu b’ibijuju babarira bamwe b’incabwenge bati : ‘Nimutugabanirize ku mavuta yanyu, amatara yacu yazimye.’ Na bo barabishura bati : ‘Twohava tubura twese ; nimugende ku badandaza mwigurire.’
Bagiye rero kuyagura, umugeni arashika, abiteguye binjirana na we mu bugeni baca bugara urugi. Hanyuma rero, ba bandi na bo baraza bati : ‘Muhanyi, twugururire.’ Na we arabishura ati : ‘Sindabazi.’
Nimwame maso, kuko mutazi umusi ntimumenye n’isaha. »

IGISOMWA CA MBERE

Ivyo dusoma mu gitabu c’Umuhanuzi Malakiya (1, 14b-2, 2b. 8-10)

Mwarataye inzira, mutako muhubisha benshi

Ng’iri ijambo ry’Umukama Imana y’ingabo :
Jewe ndi Umwami w’abami, izina ryanje ni rurangiranwa mu makungu. None rero basaserdoti, tege amatwi : nimutangamburukira, ngo mwitwararike kuninahaza izina ryanje, – rivumerewe n’Umukama Imana y’ingabo, – nzobavuma, n’imihezagiro yanyu ntibe igifata. Mwarataye inzira nari naberetse, mutako muhubisha benshi kubera inyigisho zanyu, mwarasambuye isezerano rya Levi, – rivumerewe n’Umukama Imana y’ingabo. – Nanje, igihe cose mwanse gukurikiza inyigisho zanje mukagira nkunzi mw’ibanga ryanyu, narabatetereje, ndabagira ubusa, muteterwa n’igihugu cose.

Mbe, twese ntitwamuka ku muvyeyi umwe ? Ntitwaremwe twese n’Imana imwe nsa ? None ni kuki twankana urunuka, tukonona isezerano rya ba sokuru ?

IZABURI 130 (131), 1. 2. 3

Icit : Nzigamira umutima mu mutekano,
         hafi yawe, Mukama.

Mukama, umutima wanje ntiwigeze wivyimbisha,
kandi sinigeze nderembuza amaso ;
sinigeze nirukira ubukuru,
kibure ngo ncambirwe gukora ibitangaro bindengeye.

Oya nyabuna, umutima wanje ntuhugumbwa,
uguma witekaniye wibereye mu gacerere ;
nk’umwana ari mu maboko ya nyina wiwe,
numva urweze muri jewe nk’umwana w’umucuko.

Izigire Umukama, Israeli,
ubu no mu myaka yose.

IGISOMWA CA KABIRI

Ivyo dusoma mw’Ibaruwa rya mbere Umutumwa Paulo yandikiye Abanyatesalonika (2, 7b-9. 13)

Ico twashaka kubahebera si Inkuru Nziza y’Imana gusa, ariko kandi ni ubuzima bwacu

Ncuti zanje,
Twamye twitonda hagati yanyu, nka kurya umuvyeyi abungabunga abana biwe akabonsa. Ni ko twabagiriye igishika, bigatuma dushaka kubahebera Inkuru Nziza y’Imana, tukabahebera n’ubuzima bwacu, kuko mwabaye abo dukunda rwose.

Muribuka, bebewacu, ibikorwa n’uburuhe twarimwo : twarabamenyesheje Inkuru Nziza y’Imana turiko turakenura ijoro n’umutaga, kugira ntitugore n’umwe muri mwebwe. Natwe, igituma tudahengeshanya gukengurukira Imana, ni uko, mu kwakira Ijambo ry’Imana mwumvise kuri twebwe, mutaryakiriye nk’ijambo ry’abantu, ariko mwaryakiriye nk’uko riri mu vy’ukuri, nk’ijambo ry’Imana ; kandi iryo jambo ntirybapfuyeko ubusa mwebwe abemera.

INKURU NZIZA

Alleluia, alleluia.

So mufise ni umwe, ni uwo ari mw’ijuru ;
Umuhanyi mufise ni umwe, ni we Kristu.

Alleluia.

Ivyo dusoma mu Nkuru Nziza yanditswe na Matayo (23, 1-12)

Ico bavuga si co bakora

Muri irya misi,

Yezu yabariye ishengero n’abigishwa biwe ati : « Abigisha n’Abafarizayo bari mu cicaro ca Moshe : ivyo bababwira vyose rero murabikore, mugireko mubizigame ; yamara ntimubigane mu vyo bakora, kuko ico bavuga si co bakora. Bazigira abantu ku mizigo badashobora, na bo badashaka kuyikozako n’urutoke. Ivyo bakora vyose babikora ngo babonwe ; ni co gituma bambara mu ruhanga ifilakteriya, bakagerekako ubuyonga bw’imitamana yabo. Bakunda kwitangira imbere mu batumire, kwicara ku ntebe z’imbere mu masinagoga, kugirwako bwakeye ku mbuga ahabona, n’uko babita abigisha.

Mweho, ntihagira uwemera ko bamwita Mwigisha, kuko Umwigisha wanyu ari umwe, namwe muvukana mwese. Mweho, hano kw’isi nta wundi mwokwita Dawe, kuko So mufise ari umwe, ni uwo ari mw’ijuru. Ntibabite Muhanyi, kuko Umuhanyi mufise ari umwe, ni we Kristu.

Umukuru muri mwebwe n’abe umusuku w’abandi. Uwuzokwishira hejuru bazomuhinyuza, na we uwuzokwicisha bugufi bamuninahaze. »