Accueil » Parole de Dieu (en Kirundi) » Temps Ordinaire (Page 33)
Archives de Catégorie: Temps Ordinaire
Mes Photos sur Flickr
IDOMINIKA YA 22 YO MU MWAKA (Umwâka A)
IGISOMWA CA MBERE
Ivyo dusoma mu gitabu c’Umuhanuzi Yeremiya (20, 7-9)
Ijambo ry’Imana ryanteye iceyi
Ewe Mukama, waranyoheje, nanje ndagukurikira, warandushije ubukomezi, urantsinda. None nsigaye ndi agatwengo ka barundi, bose barantyekeza. Uko mvuze ijambo kwose, ni ko nsemerera nti : « Umuryano, ugusambura ! » Ijambo ry’Imana ryanteye iceyi, rimpa amenyo y’abatwenzi umusi wose. Nabaye ncibwira nti : « Sinkimukubitizako agatima, ntaco nkivuga kw’izina ryiwe » ; nza numva urubeya rwaka mu muri jewe, runyengetera mu musokoro, runshwara umubiri wose, birananira n’ukwiyumanganya ngo ndarurinde.
IZABURI 62 (63), 2. 3-4. 5-6. 8-9
Icit : Umutima wanje urakunyotewe,
Mukama, Mana mfise.
Mana, ni Wewe Mana yanje,
Mpora ndondera kuva mu gitondo ca kare ;
umutima wanje urakunyotewe.
Nanje ndakwipfuza,
muri iyi si yase imigaga itagira n’ikinyotera.
Ni ko, narakubonye mu ngoro yawe,
ndihweza ububasha n’ubuninahazwa bwawe ;
niho urukundo rwawe rwandutira amagara,
ngashobora kugushimagiza!
Ni ko, nzoguma nguhezagira umwanya nkiriho,
nzokwayira iminwe izina ryawe ;
niho nzohimba nk’uwagaburiwe imisoso n’ibinure,
nzoguhaya mpimbarwe n’ukuguhoza mu kanwa.
Nkako, waje kuntabara :
nanje nakuvugirije impundu ndi mu mutamana wawe!
Umutima wanje wose uraguhurumbira,
ukuryo kwawe ni kwo kunshigikiye.
IGISOMWA CA KABIRI
Ivyo dusoma mw’Ibaruwa Umutumwa Paulo yandikiye Abaromani (12, 1-2)
Nimuhereze Imana imibiri yanyu nk’ishikanwa rizima
Ncuti zanje,
Ndabahanuye kubw’ikigongwe c’Imana ngo muiyhereze imibiri yanyu nk’ishikanwa rizima, ryeranda, riyishika ku nyota ; uko ni ko musenga Imana mu kuri. Kandi nimureke kwigana imigenzo y’iyi si, arikonimwisubireko mu gutahuza ibintu, mubonereho kwiyubura no gutegera ico Imana ishaka, iciza, igishemeye be n’igitunganye cose.
INKURU NZIZA
Alleluya, alleluya.
Ese Imana y’Umukama wacu Yezu Kristu
Yomurikira amaso y’imishaha yacu,
kugira ngo turimbure ukwizigira yaduhamagariye uko kungana.
Ivyo dusoma mu Nkuru Nziza yanditswe na Matayo (16, 21-27)
Uwushaka kungendanira niyihebe
Petero yari yabwiye Yezu ati : « Uri Kristu, Umwana w’Imana nzima. » Kuva ico gihe rero, Yezu atangura gusobanurira abigishwa biwe ko abwirizwa kuja i Yeruzalemu, akahababarira menshi, ababazwa n’abashingantahe n’abakuru b’abasaserdoti n’abigisha, akicwa, hanyuma ku musi ugira gatatu akazuka. Petero rero amwihereranije, aja mu vyo kumutonganya ati : « Ntirikabe, Mukama, ivyo ntibizogushikira n’intete. » Yezu ahindukiye, abwira Petero ati : « Vaho, igira inyuma, wa shetani we ! Uriko urantsitaza. Ivyiyumviro vyawe, si ivy’Imana, ni ivy’abantu. »
Hanyuma Yezu abwira abigishwa biwe ati : « Uwushaka kungendanira niyihebe, yikorere umusaraba wiwe, ankurikire. Na none, uwugomba kurokora ubuzima bwiwe, azobubura, na we uwuzobuheba kubwanje, azoburonka. Mbega, umuntu vyomumarira iki gutunga ivy’isi vyose, aroshe ubuzima bwiwe ? Ubona umuntu yotanga ibingana iki ngo abucungure ? Aho rero Umwana w’umuntu azoza mu buninahazwa bwa Se akikijwe n’abamarayika biwe, ni ho azohemba umuntu wese ku bikorwa vyiwe. »
Partager
IDOMINIKA YA 21 YO MU MWAKA (Umwâka A)
IGISOMWA CA MBERE
Ivyo dusoma mu gitabu c’Umuhanuzi Izaya (22, 19-23)
Nzogushinga imfunguruzo z’inzu ya Dawidi
Ng’iri ijambo Umukama yashikirije Sobina, umukuru w’igisengero : « Ndagukuye mu gikorwa cawe, ndagukuye mu kibanza cawe. Uyu musi nyene, ndahamagara umusuku wanje Eliyakimi mwene Hilikiyasi. Ndamwambika umutamana wawe, ndamukenyeze umukanda wawe, ndamuhe ubukuru bwawe, aheze abe umuvyeyi w’abantu bose b’i Yeruzalemu n’abo mu muryango wa Yuda. Urufunguruzo rw’inzu ya Dawidi ndarushize ku bitugu vyiwe ; niyugurura, ntawuzokwugara, niyugara, ntawuzoshobora kwugurura. Ndamushinze ahantu hakomeye cane nk’umusumari, azobera umuryango wa se ingoma y’ubuninahazwa. »
IZABURI 137 (138), 1-2a. 2b-3. 6. 8bc
Icit : Urukundo rwawe, Mukama, rwamaho imyaka yose ;
ntuhebe rero ivyiza wama utugirira.
Ngira ngukengurukire n’umutima wanje wose
amajambo yanje yashitse mu nyumviro zawe ;
ngira nkuririmbire imbere y’Abamarayika,
nunamire ingoro yawe nyeranda.
Ndagukengurukiye kubera urukundo rwawe n’ukuri kwawe,
ivyo waturaganiye birarengeye ivyavuzwe kuri Wewe ;
aho nagutabaza, waranyumviye,
ngo ngire ubwoba, urabunkiza, ungira umutinyutsi.
Ego niko, kuva mw’ijuru Umukama abona abicisha bugufi,
Ariko abanyabwishime bo abamenyera kure.
Urukundo rwawe, Mukama, rwamaho imyaka yose ;
Ntuhebe rero ivyiza wama utugirira.
IGISOMWA CA KABIRI
Ivyo dusoma mw’Ibaruwa Umutumwa Paulo yandikiye Abaromani (11, 33-36)
Vyose biva kuri We, vyose bibeshwaho na We kandi vyose birora kuri We
Ese ingene itunga, ubwitonzi n’ubumenyi bw’Imana ari agatangaza ! Ese ingene ingingo zayo atawushobora kuzitohoza n’ingene inzira zayo atawushobora kuzitegera ! Ni nde yoba yaramenye iciyumviro c’Um’kama ? Canke ni nde yamubereye umuhanuzi ? Canke ni nde yoba yaramwitanze akamugabira ngo na We aze amusubize ? Vyose biva kuri We, vyose bibeshwaho na We kandi vyose birora kuri We : n’aninahazwe mu myaka yose ! Amen.
INKURU NZIZA
Alleluya, alleluya.
Uri Petero, no kuri iryo buye nzokwubakako Ekleziya yanje ;
n’ingabo za Shetani ntizizoyisenyura.
Ivyo dusoma mu Nkuru Nziza yanditswe na Matayo (16, 13-20)
Uri Petero, ndaguhaye imfunguruzo z’Ubwami bw’ijuru
Muri irya misi,
Yezu yari ashitse mu ntara ya Sezareya ya Filipo ; araheza abaza abigishwa biwe ati : « Mwumva Umwana w’umuntu bamuvugako iki ? »
Bamwishura bati : « Bamwe bagira ngo ni Yohani Batista, abandi Eliya, abandi ngo ni Yeremiya, abandi na bo ngo ni umuhanuzi mu bandi. » Yezu asubizayo ati : « Mweho mwiyumvira ko ndi nde? »
Simoni Petero yishura ati : « Uri Kristu, Umwana w’Imana nzima. »
Yezu na we ati : « Urahiriwe, Simoni mwene Yona, kuko atari wewe uvyibwiye, ubimenyeshejwe na Data ari mw’ijuru. Nanje, ndabikubariye, uri Petero, no kuri iryo buye nzokwubakako Ekleziya yanje ; n’ingabo za Shetani ntizizoyisenyura. Nzoguha imfunguruzo z’Ubwami bw’ijuru : ico uzoboha kw’isi cose kizoba kiboshwe no mw’ijuru, ico uzobohora kw’isi cose kizoba kibohowe no mw’ijuru. »
Agirako yihanikiriza abigishwa biwe ngo ntihagire uwo babwira ko ari We Kristu.
Partager
IDOMINIKA YA 17 YO MWAKA (Umwâka A)
IGISOMWA CA MBERE
Ivyo dusoma mu gitabu ca mbere c’Abami (3, 5. 7-12)
Warisabiye umutima w’ubwitonzi
Umusi umwe, Salomo yari i Gabaoni, Umukama araheza aramubonekera mu ndoto, ati : « Nsaba ico noguha. » Salomo aramwishura ati : « Mukama, Mana yanje, jewe umusavyi wawe, ni Wewe wanyyimitse, nsubira ku ngoma ya Dawidi, umuvyeyi wanje ; none numva nkiri muto cane, sinzi gutegeka. Raba, umusavyi wawe ari hagati y’igihugu witoreye, igihugu amahanga ata n’umwe yoshobora n’uguharura ngo amenye abantu bari muri co uko bangana. None rero, tabaza umusavyi wawe umutima w’ubwitonzi, kugira ngo ashobore gutandukanya neza akabi n’akeza ; ahandi ho iki gihugu cawe kingana gutyo, ni nde yoshobora kugitwara ? »
Umukama aranezerwa n’ico gisabisho ca Salomo, amwishura ati : « Kubera ko wansavye ivyo, utansavye kuramba canke itunga ryinshi canke kumara abansi bawe, ariko wisabiye ubwenge n’ubwitonzi, jewe ndakugabiye ico wansavye : ndaguhaye umutima w’ubwitonzi ata n’umwe arigera aronka, kandi ata n’umwe azosubira kuronka. »
IZABURI 118 (119), 57. 72. 76-77. 127-128. 129-130
Icit : Ukuntu nkunda amabwirizwa yawe, Mukama !
Uruhara natoye, Mukama,
ni urw’ukugumya amategeko yawe.
Ijambo riva mu kanwa kawe rindutira
Amafeza n’inzahabu ibihumbi.
Ntabara, umpoze n’urukundo rwawe,
nk’uko wabiraganiye umusavyi wawe.
Ngirira imbabazi umpangaze,
kuko amabwirizwa yawe ampimbara.
Nico gituma nkunda amabwirizwa yawe
Kurusha n’inzahabu ityoroye.
Nico gituma ngendera ku mabwirizwa yawe,
nkanka ikinyoma cose.
Amategeko yawe ni akaroruhore,
Nico gituma umutima wanje uyazigama.
Ijambo ryawe riraboneshereza abatobato,
rikabaha ubwenge.
IGISOMWA CA KABIRI
Ivyo dusoma mw’Ibaruwa Umutumwa Paulo yandikiye Abaromani (8, 28-30)
Imana yatugeneye kugira agashusho k’Umwana wayo
Ncuti zanje,
Turazi neza ko Imana ifasha abayikunda, abo yitoreye nk’uko yabitegekanije, ikabagirira ivyiza. Abo yashimye kuva na kera, yarabageneye kuzofata agashusho k’Umwana wayo, kugira ngo uno Mwana abe imfura y’abavukanyi benshi cane. Abo yigeneye, ni bo kandi yatoye ; abo yatoye, ni bo kandi yagize intungane ; abo yagize intungane, ni bo kandi yaninahaje.
INKURU NZIZA
Alleluya, alleluya.
Uragahezagirwa, Mana Data, Mukama w’ijuru n’isi,
kuko wamenyesheje abatobato amabanga y’Ubwami bwawe.
Ivyo dusoma mu Nkuru Nziza yanditswe na Matayo (13, 44-52)
igisomwa kigufi : 13, 44-46
Ashora ivyo atunze vyose, ngo yigurire nya murima
Muri irya misi,
Yezu yaciriye iyi migani ishengero ry’abantu, ati : « Ubwami bw’ijuru busa n’itunga ryari rinyegeje mu murima ; hanyuma umugabo araryitorera, ararinyegeza. Aca ajana akanyamuneza kenshi, aja gushora ivyo atunze vyose ngo yigurire nya murima. Kandi Ubwami bw’ijuru busa n’umucuruzi yironderera intabonwa. Asanga intabonwa itari bwaboneke, aja gushora ivyo atunze vyose ngo ayigurire.
Igisomwa kigufi giherera aha
Kandi Ubwami bw’ijuru busa n’urusenga baterera mu kiyaga, hanyuma rugafata ifi z’ubwoko bwinshi. Rumaze kwuzura, abarovyi bakarukwegera ku nkombe, bakicara bagasobanura ifi nzizanziza bakabika, imbimbi na zo bakazita.
Ni uko bizomera ku muhero w’isi ; abamarayika bazoza basobanure ababi n’abeza, ababi batabwe mu nyenga y’umuririro, baharirire kandi baharyanishirize insya z’amenyo. Murumvise ivyo vyose ? » Baramwishura bati : « Turavyumvise. » Asubizayo ati : « Nico gituma umwigisha wese yigishijwe ibiraba Ubwami bw’ijuru ameze nka senaka mu rugo asobanura mw’itunga ryiwe ibintu bishasha n’ivya kera. »
Évangéliser les aréopages contemporains 