Accueil » Parole de Dieu (en Kirundi) » Temps Ordinaire (Page 41)
Archives de Catégorie: Temps Ordinaire
Mes Photos sur Flickr
IDOMINIKA YA 15 YO MU MWAKA
IGISOMWA CA MBERE
Ivyo dusoma mu gitabu c’Ukwibutsa Amategeko 30, 10-14
Itegeko ry’Imana ryanditswe mu mushaha w’umuntu
Muri iya minsi, Musa yabariye ishengero ry’Abanyisraeli ati : « Umviriza ijwi ry’Umukama Imana yawe, mu kugumya amabwirizwa n’amateka yiwe yanditswe muri iki gitabu c’Amabwirizwa ; n’usubize agatima ku Mukama Imana yawe n’umushaha wawe wose, n’umutima wawe wose. Iri bwirizwa nguhaye uyu musi ntirikurengeye, urashobora kurirangura. Ko ritari mw’ijuru, ntuze urinde kwibaza uti : ‘Ni nde azokwurira mw’ijuru akaja kuritumanurira, tukaryumva, tukaboneraho kurikurikiza ?’ Ko ritari hakurya y’amazi, ntuze wibaze uti : ‘Ni nde azojabuka kurituzanira, tukaryumva, tukaboneraho kurikurikiza ?’ Iryo jambo riri hafi yawe, riri mu kanwa kawe no mu mutima wawe, kugira ngo urikurikize.»
IZABURI 68 (69), 14. 17. 30-31. 33-34. 36ab.37
Icit : Mwa bantu muciye bugufi, nimurondere Imana ; ni ho muzobona ubuzima.
Jeho mboneyeho kugutakambira, Mukama /muri iki gihe c’ukunyereka ubuntu bwawe, Mana mfise /n’unyishure kubera imbabazi nyinshi umfitiye,/kuko ari Wewe woshobora kunkiza rwose./
Urazirikanye, Mukama, urukundo rwawe ni akaroruhore,/kubw’imbabazi nyinshi umfitiye, n’undabe ryiza !/Jeho ndi umurushwa, ndababaye ;/rukiza rwawe nirumvyure, Mana mfise./
Nzoheza ninahaze izina ry’Imana,/nzorivyinira, nzorikengurukira./Abantu baciye bugufi barabibonye barahimbarwa :/« Eka namwe muhurumbira Imana,/nimusubize umutima hamwe !»/
Na none, Umukama yumvira abicisha bugufi,/ntarenzako amaso abiwe ari imbohe./Imana izobogora Siyoni/Kandi izokwubaka ibisagara vya Yuda,/kugira ngo abasavyi bayo bahatorane,/kandi abakunda izina ryayo bahagerere.
IGISOMWA CA KABIRI
Ivyo dusoma mw’Ibaruwa Umutumwa Paulo yandikiye Abakolosi : 1, 15-20
Kubwiwe no muri We, ni ho vyose vyaremewe
Kristu ni We gashusho k’Imana itaboneka, ni We yaboneye izuba zina kiremwa cose, kuko muri We ariho vyose vyaremewe, ivyo mw’ijuru n’ivyo kw’isi, ibiboneka n’ibitaboneka, yaba Abashingantahe canke Ingabo canke Inkomezi canke Intwaza z’Ijuru, Vyose ni We yabiremye kandi ni We maherezo ya vyose. Yamye ariho vyose bitarahaba kandi vyose bibeshwaho muri We. Ni We kandi umutwe w’umubiri wiwe ari wo Ekleziya. Ni We vyose vyamukako, ni We mfura y’abapfuye, Kugira ngo abe uwa mbere muri vyose, Kuko Imana yashimye ko umusesekara wayo wose Uvyagira muri Kristu, Igashima ko ku bwiwe vyose bisubira kwuzura na Yo, ari ivyo kw’isi ari ivyo mw’ijuru, Igihe yazana amahoro kubw’amaraso yasheshe ku musaraba.
INKURU NZIZA
Alleluya, alleluya.
Amajambo yawe, Mukama, araduha umutima n’ubuzima ; urafise amajambo y’ubuzima budahera.
Alleluya.
Ivyo dusoma mu Njili Nyeranda yanditswe na Luka 10, 25-37
Ibwirizwa ry’urukundo
Umusi umwe, Umwigisha yari aho ava hasi ngo ageze Yezu, ati : « Mbega, Mwigisha, nokora iki ngo nze ntorane ubuzima budahera ?»Yezu na we aramwishura ati : « None, mu mabwirizwa handitswe iki ? Uhora usomamwo ibiki ? » Uno na we amwishura ati : « Urakunda Umukama Imana yawe n’umushaha wawe wose, n’umutima wawe wose, n’amagara yawe yose, n’ubwenge bwawe bwose ; urakunda kandi mugenzawe nk’uko wikunda wewe nyene.» Yezu na we ati : « Wishuye neza ; genda, ugire gurtyo nyene, uzohoraho.»
Ariko, wa Mwigisha arondera ingene yokwikurayo, abaza Yezu ati : « Mbega, mugenzanje ni nde ?» Yezu amusubiza ati :
The Good Samaritan by Aimé Morot (1880) shows the Good Samaritan taking the injured man to the inn. (Photo credit: Wikipedia)
«Habaye umuntu yariko aramanuka ava i Yeruzalemu aja i Yeriko ; arahava agwa mu bisuma, bihejeje kumwambura, biramukubita, birigira, bimusiga ari intere. Hanyuma rero, umusaserdoti amanukana nya nzira ; ngo amubone, aca iruhande arigira. Hanyuma na ho, harenguka umulevita ; ngo amubone, aca iruhande ararengana.
Umunyasamariya na we yari yimariyeurubanza ; aramurengukako, ngo amubone amutera ikigongwe ; aramwegera, apfuka inguma ziwe, azisukako amavuta n’umuvinyu, araheza amushira ku gitwazi ciwe, aja kumwakira indaro, aramubungabunga. Ngo buce, yakira idenariyo zibiri, azihereza nyen’indaro, amugira ati : ‘ Murwaze neza ; ibindi vyose uzomutangira, nzobigusubiza ngarutse.’
None ku bwawe, muri abo bantu batatu, ni nde yagiriye ubugenzi wa muntu yagwa mu bisuma ?» Wa Mwigisha yishura ati : « Ni uwo yamugiriye imbabazi.» Yezu na We ati : « Genda nawe rero, ugire gurtyo. »
Partager
IDOMINIKA YA 14 YO MU MWAKA
IGISOMWA CA MBERE
Ivyo dusoma mu gitabu c’Umuhanuzi Izaya : 66, 10-14a
Urweze rwo kuronka Umukiza.
Nimunezerwe hamwe na Yeruzalemu, tambe mutarike, mwebwe abayikunda mwese ; nimwigine hamwe na yo, mwebwe mwahora muyigandariye ! Kugira ngo muze mwonke muhage, muhozwe n’ibere ryayo, musoserwe n’ubuninahazwa bwayo.
Nkako, ng’iri iriyazwe n’Umukama : Nzoyironsa amahoro atemba nk’uruzi, iteka ryayo mu makungu ringane n’uruzi rwasheshe. Imicuko yayo izorerurwa, bazoyisimbagiza. Kurya umuvyeyi ahoza umwana wiwe, niko nanje nzobahoza, mugahozwa muri Yeruzalemu. Nimwabibona, agahimbare kanyu kazoba kose, umubiri wanyu uzototahara nk’ubwatsi buremvye. Umukama azokwimenyesha abasavyi biwe.
IZABURI 65 (66), 1-3a. 4-5. 6-7a. 16.20
ICIT : Bantu muri kw’isi yose, shimagize Imana.
Bantu muri kw’isi yose, shimagize Imana,
Muririmbire izina ryayo rininahaye,
Muhimbaze ishimagizwa ryayo !
Mubwire Imana muti : « Ibikorwa vyawe ni agahambaye !»
Abari kw’isi yose baricisha bugufi imbere yawe,
bakayaga, bakaririmba izina ryawe !
Nimuze, mwirabire ibikorwa vy’Imana,
ibitangaza yagiriye abantu ni agahambaye.
Yarahinduye ikiyaga ahumutse,
abantu barijabukiye uruzi, ibirenge bidakandagiye amazi.
Aho ni ho dukura akanyamuneza kacu,
kuko ategekana ububasha imyaka n’imyaka.
Abubaha Imana mwese,
nimuze mwumvirize ivyiza yangiriye.
Imana n’ishimagizwe, Yo itirengagije igisabisho canje,
ntinyime urukundo imfitiye.
IGISOMWA CA KABIRI
Ivyo dusoma mw’ibaruwa Umutumwa Paulo yandikiye Abagalati : 6, 14-18
Umusaraba wa Yezu ni wo umukristu yishimiriza
Ncuti zanje,
Ese icompa ntihagire ikindi kintuma nishimiriza, ndetse umusaraba w’Umukama wacu Yezu Kristu !
Kuri jewe, ni wo watumye ivy’isi bibambwa, nanje nkaba uwabambwe kuri ivyo. Na none, ukugenyerwa canke ukutagenyerwa nta kamaro ; igishemeye ni ukuba ikiremwa gishasha. Abazokurikira iryo teka bose, ndabipfurije amahoro n’ikigongwe, ndavyipfurije kandi Israeli y’Imana. Kuva ubu, ntihagire uwucirirwa arangora, kuko ntwara mu mubiri wanje inkovu za Yezu. Benewacu, muramane mu mutima wanyu inema y’Umukama wacu Yezu Kristu. Amen.
INKURU NZIZA
Alleluya, alleluya.
Amahoro ya Kristu n’ahangame mu mishaha yanyu, kandi mwamane ijambo ryiwe ribuzuzamwo ivyiza vyose !
Alleluya.
Ivyo dusoma mu Njili Nyeranda yanditswe na Luka : 10, 1-12. 17-20 (igisomwa kigufi: 10, 1-9)
Intumwa mirongo indwi na zibiri zija kubura urweze rw’Ubwami bw’Imana
Umunsi umwe,
Umukama yatoye abandi bigishwa mirongo indwi na babiri, arungika babiri babiri ngo bamutange imbere mu bisagara no mu bigwati vyose aho yagira ngo aje hose.
Arababwira ati : «Ivyimburwa ni vyinshi, yamara abakozi ni bake. Sabe rero nyen’umurima, arungike abakozi benshi mu murima wiwe. Gende, ndabarungitse nk’intama mu mfyisi. Ntimutware umufuko w’amahera canke isaho canke inkweto, no mu nzira ntihagire uwo muramutsa. Inzu yose muzokwinjiramwo, ubwa mbere muvuge muti : ‘Amahoro muri iyi nzu !’ Na ho nihaba hari umuntu akwiye amahoro, amahoro yanyu azomujako ; ahandi ho, azobagarukako. Iyo nzu nyene muze muyigumemwo, murya kandi munywa ivyo basanganywe, kuko umukozi aberwa n’impembo ; ntimute umuhana mutora uwundi. Ikigwati cose muzokwinjiramwo bakabakira, murarya ivyo babazimanye ; kandi muhakirize abarwaye, mubabwire muti : ‘Ubwami bw’Imana burabegereye.’
(Igisomwa kigufi giherera aha)
Na co ikigwati cose muzokwinjiramwo ntibabakire, muraca muhava, mugeze ku nama, muvuge muti : ‘N’uyo mukungugu twahanduye turawubakunkumuriyeko, ariko mubimenye : Ubwami bw’Imana bwashitse.’ Ndabibabwiye n’ukuri : umusi uri izina, Sodoma izogirirwa ikigongwe kuruta ico kigwati.»
Abigishwa mirongo indwi na babiri bagaruka banezerewe bati : « Mukama, n’amashetani twayirukanye kw’izina ryawe ! » Yezu arababwira ati : « Nabonye shetani ikoroka iva mu kirere nk’inkuba ! Raba, ndabahaye ubukuru bw’ukuzokandagira inzoka, utumina n’ububasha bwose bw’umwansi ; ntihagire n’ikibabera nabi. Ariko rero ntimikihaye ngo n’uko imitima yabagamburukiye: nimunezerwe nyabuna kuko izina ryanyu ryanditswe mw’ijuru. »
Partager
IDOMINIKA YA 13 YO MU MWAKA
IGISOMWA CA MBERE
Ivyo dusoma mu gitabu ca mbere c’Abami : 19, 16b. 19-21
Elize arahaguruka, akurikira Eliya
Muri irya misi, Umukama yabwiye umuhanuzi Eliya ati : “Urasiga amavuta Elize mwene Shafati, agusubirire mw’ibanga ry’ubuhanuzi.”
Avuye hano, asanga Elize ariko ararimisha inka mirongo ibiri na zine, na we azihagaze inyuma. Eliya amuca iruhande, amutererako umutamana wiwe. Elize aca asiga aho za nka, yiruka inyuma ya Eliya, amusaba ati : “Ndagusavye, nje gusezera data na mama, ndaheza ngaruke ngukurikire.”
Eliya amwishura ati : “Niwigire, ubonye hari ico nakugize!”
Elize aragenda, afata inka zibiri, arazibaga ; inyama azicaniriza ibiti vyari bifatanije nya nka, aragaburira abantu biwe barafungura. Hanyuma arahaguruka, akurikira Eliya, amubera umugendanyi.
IZABURI : 15 (16), 1. 2a. 5. 7-8. 9-10. 11
ICIT: Mukama, ni Wewe ntoranwa yanje.
N’unzigame, Mana yanje, kuko ari Wewe mahungiro yanje,
nabwiye Umukama nti : “Umukama ni Wewe.”
Mukama, ni Wewe ntoranwa yanje, ni Wewe ruhara rwanje,
ni Wewe natoranyeko iragi ryanje.
Mpezagira Umukama, We muhanuzi wanje,
Kandi mw’ijoro hari ico umutima umbarira.
Mpoza Umukama imbere yanje, kuri ico simpengeshanya,
kandi ko asanzwe ari iburyo bwanje sintirimuka.
Umutima wanje urahimbarwa, kandi umushaha wanje ukanezerwa,
umubiri wanje na wo ukaruhuka, ataco winona :
na none, ntiwondeka ngo mpfe rubi,
umugenzi wawe ngo aherere mu cobo.
Uzondangira inzira y’ubuzima,
imbere yawe agahimbare ni kose ;
iburyo bwawe akanyamuneza kazokwamaho imyaka yose.
IGISOMWA CA KABIRI
Ivyo dusoma mw’ibaruwa Umutumwa Paulo yandikiye Abagalati : 5, 1. 13-18
Mwahamagariwe kwidegemvya
Ncuti zanje,
Kristu yaturokoye ngo tube mu mwidegemvyo ; muragumye umutima rero kandi ntimusubire kwita mu bushumba.
Mweho, mwahamagariwe kwidegemvya : mugabo uwo mwidegemvyo ntimuwugire urwitwazo rwa kamere mbi yanyu, ariko urukundo nirubatume gufashanya. Ibiri mw’Ibwirizwa vyose birangukira kuri iri jambo rimwe : urakunda mugenzawe nk’uko wikunda wewe nyene. Mugabo nimwaryana mugashikurana, muragabe ntimumarane.
Ico ndababwiye ni iki : nimugenzwe na Mutima, niho mutazokurikiza ivyo kamere mbi yanyu yipfuza. Erega kamere mbi y’umuntu yipfuza ico umutima wanka, umutima na wo ukipfuza ico kamere y’umuntu yanka. Ivyo vyompi bikarwanira muri mwebwe, niho mubona mudakora ivyo mushaka. Mugabo, nimwaba muyoborwa na Mutima, ntimuzoganzwa n’Ibwirizwa.
INKURU NZIZA
Alleluya, alleluya.
Yaga, Mukama, kuko umusavyi wawe ariko arumviriza ;
Ni Wewe ufise amajambo y’ubuzima budahera.
Alleluya.
Ivyo dusoma mu Njili Nyeranda yanditswe na Luka : 9, 51-62
Gukurikira Yezu mu nzira y’umusaraba
Umusi w’ugufatwa uhaye wegereza, Yezu agenda icese mu nzira irora i Yeruzalemu. Atuma integuza imbere yiwe ; na zo ziragenda, zija mu mihana y’Abanyasamariya kumuteguriza ; ariko ntibamwakira, kuko yaja i Yeruzalemu. Abigishwa biwe Yakobo na Yohani babibonye, baramubaza bati : “Mukama, ntiwoturekura tugahimiriza umuriro, ukabashungurukirako, ukabatikiza?” Arahindukira, arabakankamira ati : “Mwebwe mwaranyobeye : Umwana w’umuntu ntiyazanywe n’ugutikiza, yaje gukiza.”
Baca baja mu yindi mihana.
Bakiri mu nzira, sinzi umuntu agize ati : “Nzogukurikira aho uzoja hose.”
Yezu amwishura ati : “Imbwebwe zirafise uburumba zitahamwo, inyoni zo mu kirere zikagira ivyari ; ariko Umwana w’umuntu we ntagira n’aho akika umusaya.”
Hanyuma sinzi uwo yabariye ati : “Nkurikira.”
Uri uwundi ati : “Mukama, ndagusavye mbanze kuja guhamba dawe.”
Yezu na we aramwishura ati : “Reka abapfa bahambe abapfu babo ; nawe fashako wigishe Ubwami bw’Imana.”
Haza uwundi amubwira ati : “Nzogukurikira, Mukama ; ndagusavye gusa gusiga nsezeye ab’imuhira.”
Yezu aramwishura ati : “Uwufashe isuka yari agiye gukora agasubira inyuma gufufura, uyo ntakwiranye n’Ubwami bw’Imana.”
Évangéliser les aréopages contemporains 