Accueil » Parole de Dieu (en Kirundi) » Temps Ordinaire (Page 42)
Archives de Catégorie: Temps Ordinaire
Mes Photos sur Flickr
IDOMINIKA YA 12 YO MU MWAKA
Croix de Pennavern.JPG (Photo credit: Wikipedia)
IGISOMWA CA MBERE
Ivyo dusoma mu gitabu c’Umuhanuzi Zakariya (12, 10-11. 13, 1)
(Bazokwihweza uwo basogose)
Ng’iri ijambo Umukama avumereye :
Abo mu muryango wa Dawudi n’abo muri Yeruzalemu nzobaronsa umutima mwiza. Bazoheza bihweze uwo basogose ; bazomuririra nk’abaririra umwana w’ikinege, babogoza nk’abaririra umwana w’imfura. Muri ico gihe, i Yeruzalemu hazokwaduka induru n’iminiho, nka kumwe yari i Hadadi-Rimoni, mu kiyaya ca Megido. Kuri urya munsi, isoko ry’mazi rizodudubiriza abo mu muryango wa Dawudi n’abo muri Yeruzalemu, ngo ribakize igicumuro cose n’iceyi cose.
IZABURI 62(63), 2abcd. 2e-4. 5-6. 8-9
ICIT : Umutima wanje urakunyotewe, Mukama, Mana mfise.
Mana, ni Wewe Mana yanje,
Mpora ndondera kuva mu gitondo ca kare ;
umutima wanje urakunyotewe.
Nanje ndakwipfuza,
muri iyi si yase imigaga itagira n’ikinyotera.
Niko, narakubonye mu ngoro yawe,
ndihweza ububasha n’ubuninahazwa bwawe ;
niho urukundo rwawe rwandutira amagara,
ngashobora kugushimagiza!
Niko, nzoguma nguhezagira umwanya nkiriho,
nzokwayira iminwe izina ryawe ;
niho nzohimba nk’uwagaburiwe imisoso n’ibinure,
nzoguhaya mpimbarwe n’ukuguhoza mu kanwa.
Nkako, waje kuntabara :
nanje nakuvugirije impundu ndi mu mutamana wawe!
Umutima wanje wose uraguhurumbira,
ukuryo kwawe ni kwo kunshigikiye.
IGISOMWA CA KABIRI
Ivyo dusoma mw’ibaruwa Umutumwa Paulo yandikiye Abagalati (3, 26-29)
(Ko mwabatijwe muri Kristu, mwambaye Kristu)
Ncuti zanje,
Mwese muri abana b’Imana kubera ukwemera mufise muri Kristu Yezu. Mwese, ko mwabatijwe muri Kristu , mwambaye Kristu ; nta Muyahudi canke Umugreki, nta mushumba canke uwidegemvya, nta mugabo canke umugore bakiriho, kuko mwese muri umwe muri Kristu Yezu. Nimwaba muri aba-Kristu, muri uruvyaro rwa Ibrahimu, n’umuhango Imana yamwemereye nimwe mwawurazwe.
INKURU NZIZA
Alleluya, alleluya
Umukama yavuze ati : “Intama zanje zirumviriza ijwi ryanje, kandi ndazizi na zo zikankurikira.”
Alleluya.
Ivyo dusoma mu Njili Nyeranda yanditswe na Luka (9, 18-24)
(Petero yerekana ukwemera kwiwe)
Umunsi umwe, Yezu yariko arasengera ahiherereye, abigishwa biwe na bo bari kumwe. Araheza arababaza ati : “Mwumva abantu bavuga ngo ndi nde ?” Baramwishura bati : “Bamwe bavuga ngo uri Yohani Batista, abandi ngo uri Eliya, abandi ngo uri umuhanuzi yazutse muri bamwe ba kera.” Yezu araheza arababaza ati : “Mweho, muvuga ngo ndi nde ?” Petero, aba ari we avuga, yishura ati : “Uri Kristu w’Imana.”
Araheza arabihanikiriza ashimitse ngo ntihagire uwo babibwira, ati : “Umwana w’umuntu abwirizwa kubabara menshi, agacibwa n’abashingantahe n’abasaserdoti n’abanditsi, akicwa, hanyuma akazuka ku munsi ugira gatatu.”
Hanyuma bose ababwira ati : “Uwushaka kungendanira niyihebe we nyene, yikorere umusaraba wiwe w’iminsi yose, ankwirikire. Nkako, uwuzoshaka kurokora ubuzima bwiwe azobubura, na we uwuzobuheba kubwanje azoburokora.”
Partager
IDOMINIKA YA 11 YO MU MWAKA C
IGISOMWA CA MBERE
Ivyo dusoma mu gitabu ca kabiri ca Samuweli 12, 7-10.13
(Dawudi agaya igicumuro ciwe Imana ikamugirira ikigongwe)
Dawudi amaze gucumura, Umukama yamutumyeko umuhanuzi Natani. Ashitseyo, aramubarira ati : “Ng’iri iriyazwe n’Umukama Imana y’Israeli : naragusize amavuta, nkugira umwami w’Israeli, naragukijije Sauli, ingabo z’umwansi wawe narazigutsindiye, (abagore ba shobuja narabaguhaye), naraguhaye ingoma ya Israeli n’iya Yuda. Ni vyaba bidakwiye nzokwongera ibindi. None ni kuki wakengereye Umukama ugakora ibimushavuza? Warakubise Uriya wo mu bahititi, araryama, umugandaguza inkota y’Abamoniti, umugore wiwe na we uramwitwarira. None rero, inkota ntizova mu muryango wawe, kuko wankengereye ugatwara muka Uriya, Umuhititi, ukamugira umugore wawe.”
Dawudi araheza abwira Natani ati : “Nacumuye ku Mukama!”
Natani aramwishura ati : “Noneho Umukama arakurekuriye igicumuro cawe, ntuzopfa.”
IZABURI 31 (32), 1-2.5.7.11
ICIT : Undekurire, Mukama, ikibi nakoze.
Hahiriwe uwarekuriwe igicumuro,
uwakize akabi kiwe;
hahiriwe urya Umukama ataco yagiriza.
Navuze nti : “Ngiye gutumbera Umukama,
nirege ibicumuro nakoze.”
Nawe, Mukama, warandekuriye ikibi nakoze.
Ni Wewe mahungiro yanje,
urankiza amarushwa;
wongere unkikize impundu z’uko ndokotse.
Nezerwa, himbarwa n’Umukama,
mwa bantu b’intungane;
mutambe, mutarike,
mwebwe mufise umutima ugororotse.
IGISOMWA CA KABIRI
Ivyo dusoma mw’ibaruwa Umutumwa Paulo yandikiye Abagalati 2, 16. 19-21.
(Ukwemera Kristu nikwo kwadukijije)
Ncuti zanje,
Kuko tuzi ko umuntu ataba intungane kubera ibikorwa vy’Ibwirizwa ry’Abayahudi, ariko amuba kubera ukwemera Yezu Kristu, natwe twaremeye Kristu Yezu, kugira ngo tube intungane kubera ko twemera Kristu, atari kubera ibikorwa vy’Ibwirizwa. Na kare, Ibwirizwa ni ryo ryantumye guheba Imigenzo y’Abayahudi, ngo mbe muzima mu Mana.
Nabambanywe na Kristu : ninaba ndi muzima, sije ndi muzima, ni Kristu ari muzima muri jewe. Ivyo nkora ubu nkiri mu kamere y’umuntu, ndabikora mu kwemera Umwana w’Imana yankunze akanyigura. Simpfisha ubusa ingabirano y’Imana, kuko ni bwaba ubutungane bwavuye kw’Ibwirizwa, Kristu azoba yapfiriye ubusa.
INKURU NZIZA
Alleluya, alleluya.
Imana yaradukunze, irarungika Umwana wayo kuba iciru c’ibicumuro vyacu.
Alleluya.
Ivyo dusoma mu Njili nyeranda yanditswe na Luka 7, 36-8,3.
Umunsi umwe, umwe mu Bafarizayo yari yatumiye Yezu ngo amuzimane; Yezu rero arinjra mu nzu iwe, araheza aricara ngo afungure. Haza umugore yigenza nabi muri ico gisagara ; yari yamenye ko Yezu yatumiwe mu nzu y’Umufarizayo, araheza azana agacupa k’ibimoga neza, aja inyuma yiwe hafi y’ibirenge vyiwe, ararira amutonyangiriza amosozi ku birenge, abihanaguza imishatsi yo ku mutwe wiwe, aja arabisoma kandi abisiga ibimoga neza.
Wa Mufarizayo yamutumiye abibonye, yibwira ati : “Iyo uyu muntu aba yari umuhanuzi, yari kumenya uyu mugore amukorako uwo ari we n’ingene agenze, ko ari umunyabicumuro.”
Yezu na we amubwira ati : “Simoni, hari ico ngomba kukubaza.”
Na we ati : “Yaga, Mukama.”
Yezu aramwishura ati : “Habaye umuntu yari afise abamufitiye imyenda babiri : umwe yari amufitiye amadenariyo amajana atanu, uwundi mirog’itanu. Babuze ico bishura, abarekurira bompi. None, muri bompi, uwuzomukunda kuruta uwundi, ni nde?”
Simoni aramubwira ati : “Ngira ngo ni uwarekuriwe umwenda munini.”
Yezu aramubwira ati : “Waharashe !”
Ahindukiye araba wa mugore, abwira Simoni ati : “Uyu mugore uramubona ? Ninjiye mu nzu yawe, ntiwansuka amazi ku birenge ; ariko we, kuva aho yinjiriye, yabibombekesheje amosozi yiwe, abihanaguza imishatsi yiwe. Ntiwansomye ; ariko we, kuva aho yinjiriye, ntiyigeze ahengeshanya gusoma ibirenge vyanje. Umutwe wanje ntiwawusize ; ariko we, ibirenge vyanje yabisize ibimoga neza. Ni co gituma ndabikubwiye, ibicumuro vyiwe vyinshi biragiriwe ikigongwe, kuko yerekanye urukundo rwinshi ; ariko uwo barekuriye bike, yerekana urukundo ruke. »
Araheza abwira wa mugore ati : “Ibicumuro vyawe biragiriwe ikigongwe.”
Abo bari kumwe ku meza batangura kwibwira bati : “Uyu muntu arekura ibicumuro ni umuntu nyabaki ?”
Yezu rero abwira nya mugore ati : “Ukwemera kwawe kwagukijije, genda amahoro.”
(Igisomwa kigufi giherera ngaha)
Hanyuma rero, Yezu agenda mu bisagara no mu mihana, amenyesha Inkuru Nziza y’Ubwami bw’Imana. Bamwe cumi na babiri bari kumwe ; n’abagore bamwe yari yakuyemwo imitima mibi akabakiza n’ubundi bumuga, bari inyuma yiwe : Mariya ari we Magdalena (yari yakuyemwo amashetani indwi), Yohana umugore w’icariho ca Herodi, Suzana n’abandi bagore benshi bama babafashisha ivyabo.
Évangéliser les aréopages contemporains 