Accueil » Posts tagged 'Yeriko'
Archives de Tag: Yeriko
Mes Photos sur Flickr
IDOMINIKA YA 30 YO MU MWAKA (Umwâka B)
IGISOMWA CA MBERE
Ivyo dusoma mu gitabu c’Umuhanuzi Yeremiya (31, 7-9)
Akanyamuneza k’ukurokoka kwa Israyeli
Ng’iri iriyazwe n’Umukama :
Tambe mutārîke, muvugirize impundu Yakobo, mushemeze igihugu gisumba ibindi vyose ! Shire ijwi hejuru, mwivuge amazina muti : « Umukama yarokoye igihugu ciwe, ka kasigarira k’Abanyisrayeli ! » Ehe ngiye kubagarukana mbakure mu gihugu co mu buraruko, ndabashwabure kuva aho isi igera hose. Ntibazosiga inyuma impumyi n’uwucumbagira, abagore bibungenze n’abavuye mu kiriri ; eka, bazogaruka ino ari ishengero rinini. Bari bagiye bararira, noneho nzobagarukana imitima itekanye ; nzobereka amasôko, ndabacishe mu nzira igororotse aho batazotsitara. Erega, Israyeli nayibereye umuvyeyi, Efurayimu ni imfura yanje.
IZABURI 125 (126), 1-2ab, 2cd-3, 4-5, 6
Icit. : Ivyo Umukama yatugiriye ni agatangaza,
natwe turi mu kanyamuneza.
Igihe Umukama yabohora imbohe za Siyoni,
twari tumeze nk’abari mu ndoto ;
niho akamwemwe kashaka kutwica,
imvyino zikasana.
Niho abapagani bavuga bati :
« Ivyo Umukama yabagiriye ni agatangaza ! »
Ni ko, ivyo Umukama yatugiriye ni akaroruhore,
eka natwe twari mu kanyamuneza.
Bohora se Mukama, imbohe zawe,
uzizane nk’imigende kw’isi ikamutse.
Ababivyi mw’ibiba babiba barira,
mw’igesa bakagesa bishongora.
Bagenda bararira,
bajanye imbuto z’ukubiba ;
maze, bagarukanye imikama y’ivyimburo,
bakaza barisiga.
IGISOMWA CA KABIRI
Ivyo dusoma mw’Ikete ryandikiwe Abahebereyi (5, 1-6)
Uzokwama uri Umuherezankuka na ntaryo, nka kumwe kwa Melekisedeki
Umuherezankuka mukuru yama atorwa mu bantu, ibanga ryiwe ni ukubaserukira ku Mana; ategerezwa guhereza amashikanwa n’ingorore kubera ibicumuro vyabo. Arashobora noneho guterwa imbabazi n’abacumura kubera ubwenge buke bwabo canke kuko bazimiye, kuko na we nyene ari ntamagara; ndetse bimutuma ategerezwa kwitangira we nyene inkuka y’ibicumuro vyiwe nk’uko abigirira igihugu. Bisubiye kandi, nta muntu yiha iryo teka, ariko ariterwa n’Imana, nka kumwe kwa Aroni.
Na Kristu ubwiwe si we yihaye iteka ry’ukuba Umuherezankuka mukuru; yarihawe n’Uwamubariye ati: « Uri Umwananje, ni je nakwivyariye uyu musi. » Nk’uko yavuze ahandi ati: « Uzokwama uri Umuherezankuka na ntaryo, nka kumwe kwa Melkisedeki.»
INKURU NZIZA
Aleluya, aleluya.
Umukiza wacu Yezu Kristu yatsinze urupfu,
akaboneshereza ubuzima kubera Inkuru nziza.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Mariko (10, 46-52)
Mwigisha, ntabara mbone
Umusi umwe, Yezu yariko ara va mu gisagara ca Yeriko, we n’abigishwa biwe n’isinzi ry’abantu. Ahwana n’impumvi, mwene Timayo, yari yicaye ku nzira ashera. Yumvise ko ari Yezu w’i Nazareti ahaciye, arasemerera ati: « Yezu, Mwana wa Dawudi, ngirira ikigongwe!» Benshi baramukankamira ngo acereze; na we arushirizaho gusemerera, ati: « Mwana wa Dawudi, ngirira ikigongwe ! » Yezu rero arahagarara, ati: « Mwakure. » Bākura ya mpumyi bati: « Subiza umutima mu nda ! Va hasi : araguhamagaye. » Aterera hasi igikwemu ciwe, asimba rimwe aba ashikiriye Yezu. Yezu aramubaza ati : « Ushaka ko nkugirira iki?» Impumyi iramwishura ati: « Mwigisha, ntabara mbone ! Yezu aramwishura ati: « Genda, ukwemera kwawe kuragukijije.» Buno nyene, arakanura, agendanira Yezu.
Partager
Idominika ya 31 yo mu mwaka C.
IGISOMWA CA MBERE
Ivyo dusoma mu gitabu c’Ubwitonzi (11, 22-12, 2)
(Imana irakunda ibiremwa vyayo vyose)
Mukama, isi yose imbere yawe imeze nk’agatete k’umusenyi gahengeka umunzane, nk’ima ry’urume rizindukira gutonyangira hasi. Mukama, ufitiye imbabazi abantu, kuko ushobora vyose ; nturaba ibicumuro vyabo, kugira ngo bigarure. Nkako nyene, ufitiye urukundo rw’igishika ibiremwa vyose, nta na kimwe mu vyo wagize kigutera ishishi ; ico wanka ntiwari kukirema.
Ikidashatswe nawe coshobora kuramba gute ? Ikidahamagawe nawe coshobora kurama gute ? Igituma ugirira imbabazi ibiremwa vyose, ni uko ari rwawe, ni uko uri Rugabá ukunda ubuzima, impwemu zawe zikabeshaho vyose.
Abaguye, uritonda mu kubahanura, urabakebura, ukabereka igicumuro cabo, kugira ngo bikure mu kabi, babonereho kukwemera, Mukama.
IZABURI 144 (145) 1-2, 8-9, 10-11, 13c-14
Icit : Nzohezagira izina ryawe iminsi yose,
Mwami wanje, Mana mfise.
Hinge nkuninahaze, Mwami wanje, Mana mfise,
Mpezagire izina ryawe iminsi yose ntahengeshanya !
Eka nshaka kukuninahaza iminsi yose,
Izina ryawe ntirizomva mu kanwa.
Umukama ni Nyen’impuhwe n’ikigongwe,
Ntakaza ishavu, yuzuye urukundo ;
Umukama agirira ineza bose,
agirira imbabazi ivyo yaremye vyose.
Ivyo waremye, Mukama, nibigushemeze,
Abakunzi bawe nibaguhezagire !
Nibayage ubuninahazwa bw’ubwami bwawe,
Nibigane hose ubutwari bwawe !
Umukama ni imvugakuri mu majambo yiwe,
Ni urukundo mu bikorwa vyiwe vyose ;
Araramira abashaka kugwa bose,
akagorora abagoramye bose.
IGISOMWA CA KABIRI
Ivyo dusoma mw’Ikete rya kabiri Umutumwa Pawulo yandikiye Abanyatesalonika (1, 11-2, 2)
(Twitege Umukama mu mahoro atagira imvange)
Ncuti zanje,
Twama tubasabira ngo Imana yacu isange mukwiranye n’ibanga yabahamagariye ; kubera ububasha bwayo, n’ibafashe kurangura bimwe bishemeye ivyiza vyose mushaka gukora, n’iremeshe ukemera kwanyu, kugira ngo izina ry’Umukama wacu Yezu rininahazwe muri mwebwe, namwe mushimagizwe muri We : ico ni co Imana yacu n’Umukama wacu Yezu Kristu babateguriye.
Benewacu, dushaka kubahanura ku vyerekeye umuzo w’Umukama wacu Yezu Kristu n’ikoraniro ryacu hamwe na We : ntimushoke muhagarikwa umutima canke ngo muterwe ubwoba n’ijambo bitirira Mutima canke n’ijambo canke n’ikete batwitirira ryemeza ko umunsi w’Umukama uri mu gushika.
INKURU NZIZA
Aleluya, aleluya.
Imana yakunze isi gushika itange Umwana wayo w’ikinege ;
uwumwemeye wese arafise ubuzima budahera.
Aleluya.
Ivyo dusoma mu Nkuru Nziza ya Yezu Kristu nk’uko yashikirijwe na Luka (19, 1-10)
(Uguhinduka kwa Zake, umukuru w’Abatozakori)
Umusi umwe, Yezu yinjiye i Yeriko, aca mu gisagara hagati. Hakaba hari umuntu yitwa Zake ; yari umukuru w’Abatozakori kandi yari atunze. Yama yipfuza kubona Yezu uwo ari we, ariko ntiyabishobora kubera ishengero ryari ryinshi cane, na we akaba mugufi. Arirukanga, aja imbere, yurira igiti, kugira ngo ashobore kumubona, kuko ari yo nzira yajana.
Yezu, ahashitse ararangamira, aramubarira ati : « Zake, ururuka ningoga, kuko uyu munsi ndamutse ndara iwawe. » Na we aca arururuka, amwakirana akanyamuneza.
Abari aho ngo babibone, baja mu vyo kwidodomba bose, bati : « Ehe, agiye kurarira umuntu w’umunyabicumuro ! » Zake rero arahagarara, abwira Umukama ati : « Mukama, ng’ivyo ivyanje : ngiye kubicamwo kubiri, igice kimwe ngihe abarushwa ; nihaba hari uwo nanyanganije, ndamusubize ibiruta kane ivyo namutwaye. » Niho rero Yezu yavuga ati : « Uyu munsi, urukiza rwashitse muri iyi nzu, kuko n’uyu abaye umwana wa Ibrahimu. Na kare, Umwana w’umuntu yaje kurondera n’ugukiza ivyari vyazimiye. »
Partager
IDOMINIKA YA 15 YO MU MWAKA (Umwaka C)
IGISOMWA CA MBERE
Ivyo dusoma mu gitabu c’Ukwibutsa Amategeko (30, 10-14)
Itegeko ry’Imana ryanditswe mu mushaha w’umuntu
Muri iya misi, Musa yabariye ishengero ry’Abanyisraeli ati : « Umviriza ijwi ry’Umukama Imana yawe, mu kugumya amabwirizwa n’amateka yiwe yanditswe muri iki gitabu c’Amabwirizwa ; n’usubize agatima ku Mukama Imana yawe n’umushaha wawe wose, n’umutima wawe wose. Iri bwirizwa nguhaye uyu musi ntirikurengeye, urashobora kurirangura. Ko ritari mw’ijuru, ntuze urinde kwibaza uti : ‘Ni nde azokwurira mw’ijuru akaja kuritumanurira, tukaryumva, tukaboneraho kurikurikiza ?’ Ko ritari hakurya y’amazi, ntuze wibaze uti : ‘Ni nde azojabuka kurituzanira, tukaryumva, tukaboneraho kurikurikiza ?’ Iryo jambo riri hafi yawe, riri mu kanwa kawe no mu mutima wawe, kugira ngo urikurikize.»
IZABURI 68 (69), 14. 17. 30-31. 33-34. 36ab.37
Icit : Mwa bantu muciye bugufi, nimurondere Imana ;
ni ho muzobona ubuzima.
Jeho mboneyeho kugutakambira, Mukama ;
muri iki gihe c’ukunyereka ubuntu bwawe, Mana mfise ;
n’unyishure kubera imbabazi nyinshi umfitiye,
kuko ari Wewe woshobora kunkiza rwose.
Urazirikanye, Mukama, urukundo rwawe ni akaroruhore,
kubw’imbabazi nyinshi umfitiye, n’undabe ryiza !
Jeho ndi umurushwa, ndababaye ;
urukiza rwawe nirumvyure, Mana mfise.
Nzoheza ninahaze izina ry’Imana,
nzorivyinira, nzorikengurukira.
Abantu baciye bugufi barabibonye barahimbarwa :
« Eka namwe muhurumbira Imana,
nimusubize umutima hamwe !»
na none, Umukama yumvira abicisha bugufi,
ntarenzako amaso abiwe ari imbohe.
Imana izobogora Siyoni
Kandi izokwubaka ibisagara vya Yuda,
kugira ngo abasavyi bayo bahatorane,
kandi abakunda izina ryayo bahagerere.
Canke : IZABURI 18 (19), 8. 9. 10. 11
Icit : Amabwirizwa y’Umukama ni akezamutima.
Amategeko y’Umukama aratunganye,
ahembura umutima ;
amabwirizwa y’Umukama ni ay’ukuri,
niyo bwenge bw’abantu batobato.
Amategeko y’Umukama aragororotse,
ni akezamutima ;
amabwirizwa y’Umukama arasobanutse,
ni yo muco w’umutima.
Ukwubaha Umukama ni akaroruhore,
ntikuzokwigera guhera n’intete ;
Umukama ashinga intahe y’ukuri,
intahe yama itunganye.
Isumvya izahabu gukundwa,
na yo nyene itagira imvange ;
irusha kuryoha
ubuki n’umutsama.
IGISOMWA CA KABIRI
Ivyo dusoma mw’Ikete Umutumwa Pawulo yandikiye Abanyakolosi (1, 15-20)
Ku bwiwe no muri We, ni ho vyose vyaremewe
Kristu ni We gashusho k’Imana itaboneka,
ni We yaboneye izuba zina kiremwa cose,
kuko muri We ariho vyose vyaremewe,ivyo mw’ijuru n’ivyo kw’isi, ibiboneka n’ibitaboneka,
yaba Abashingantahe canke Ingabo
canke Inkomezi canke Intwaza z’Ijuru,
Vyose ni We yabiremye kandi ni We maherezo ya vyose.
Yamye ariho vyose bitarahaba kandi vyose bibeshwaho muri We.
Ni We kandi umutwe w’umubiri wiwe ari wo Ekleziya.
Ni We vyose vyamukako, ni We mfura y’abapfuye
Kugira ngo abe uwa mbere muri vyose,
Kuko Imana yashimye ko umusesekara wayo wose
Uvyagira muri Kristu,
Igashima ko ku bwiwe vyose bisubira kwuzura na Yo,
ari ivyo kw’isi ari ivyo mw’ijuru,
Igihe yazana amahoro kubw’amaraso yasheshe ku musaraba.
INKURU NZIZA
Aleluya, aleluya.
Amajambo yawe, Mukama, araduha umutima n’ubuzima ;
urafise amajambo y’ubuzima budahera.
Alleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (10, 25-37)
Ibwirizwa ry’urukundo
Umusi umwe, Umwigisha yari aho ava hasi ngo ageze Yezu, ati : « Mbega, Mwigisha, nokora iki ngo nze ntorane ubuzima budahera ?» Yezu na we aramwishura ati : « None, mu mabwirizwa handitswe iki ? Uhora usomamwo ibiki ? » Uno na we amwishura ati : « Urakunda Umuka
ma Imana yawe n’umushaha wawe wose, n’umutima wawe wose, n’amagara yawe yose, n’ubwenge bwawe bwose ; urakunda kandi mugenzawe nk’uko wikunda wewe nyene.»Yezu na we ati : « Wishuye neza ; genda, ugire gurtyo nyene, uzohoraho.»
Ariko, wa Mwigisha arondera ingene yokwikurayo, abaza Yezu ati : « Mbega, mugenzanje ni nde ?»
Yezu amusubiza ati : « Habaye umuntu yariko aramanuka ava i Yeruzalemu aja i Yeriko ; arahava agwa mu bisuma, bihejeje kumwambura, biramukubita, birigira, bimusiga ari intere. Hanyuma rero, umusaserdoti amanukana nya nzira ; ngo amubone, aca iruhande arigira. Hanyuma na ho, harenguka umulevita ; ngo amubone, aca iruhande ararengana. Umunyasamariya na we yari yimariye urubanza ; aramurengukako, ngo amubone amutera ikigongwe ; aramwegera, apfuka inguma ziwe, azisukako amavuta n’umuvinyu, araheza amushira ku gitwazi ciwe, aja kumwakira indaro, aramubungabunga. Ngo buce, yakira idenariyo zibiri, azihereza nyen’indaro, amugira ati : ‘ Murwaze neza ; ibindi vyose uzomutangira, nzobigusubiza ngarutse.’ None ku bwawe, muri abo bantu batatu, ni nde yagiriye ubugenzi wa muntu yagwa mu bisuma ?»
Wa Mwigisha yishura ati : « Ni uwo yamugiriye imbabazi.» Yezu na We ati : « Genda nawe rero, ugire gurtyo.»
Évangéliser les aréopages contemporains 