Accueil » Parole de Dieu (en Kirundi) (Page 105)
Archives de Catégorie: Parole de Dieu (en Kirundi)
Mes Photos sur Flickr
IDOMINIKA YA 3 YA PASIKA-Umwâka A
IGISOMWA CA MBERE
Ivyo dusoma mu gitabu c’Ibikorwa vy’Abatumwa : 2, 14. 22-33
Ntivyari gushoboka yuko urupfu rumutsinda
Ku musi wa Pentekoti, Petero arahaguruka ahagatiwe na bamwe Cumi n’umwe, atereza ijwi ati : « Yemwe Bayahudi namwe mwese muba ngaha i Yeruzalemu, tege amatwi aya majambo kandi muyategere. Yezu w’i Nazareti yaratewe iteka n’Imana imbere yanyu, mu kumuha ububasha bw’ugukora ibitangaro izuba ryaka, nk’uko namwe nyene mwavyiboneye. Mwaramufashe muramwicisha, mumubamba ku musaraba, mumuta mu minwe y’abansi, nk’uko Imana yari yabitegekanije. Noneho Imana yaramusubije ubuzima, imukura mu vyara
Kuko Dawidi yari yarabivuze ati :
‘Nguma nerekeje amaso ku Mukama,
kuko ahangaye iburyo bwanje ngo sintirimuke.
Nico gituma umushaha wanje wuzuye agahimbare,
nayo ururimi rwanje rukivuga amazina ;
vyongeye umubiri wanje uzokwiruhukira mu mwizero
w’uko utazorekera umutima wanje mu kuzimu
kandi utoreka umweranda wawe ngo apfe abore.
Waranyeretse inzira y’ubuzima
Ni Wewe kandi uzompimbara
Umusi nzokubona imbonankubone.’
Benewacu, nkundira ndabibutse ataco ninona ibirora kuri sokuru wacu Dawidi : yarapfuye, arahambwa, mbere n’imva yiwe turazi aho iri. Mugabo, Dawidi yari umuhanuzi kandi yari azi indahiro Imana yari yamurahiye, ko izovyagiza ku ngoma yiwe umwana ava mu nda yiwe. Nico gituma Dawudi yavuga izuka ry’Umukama wacu ko atigeze aguma mu mva z’abapfuye kandi ko umubiri wiwe utigeze ubora.
Uyo Yezu ni we Imana yasubije muzima, twebwe ni co twiboneye. Amaze kuninahazwa n’ukuryo kw’Imana kandi amaze kuronka wa Mutima Mweranda yari yaraturaganiye, yaramuturungikiye nk’uko muvyibonera mukavyiyumvira. »
IZABURI 15 (16), 1. 2a. 5. 7-8. 9-10. 11
Icit : N’undangire, Mukama, inzira y’ubuzima.
Canke : Alleluya.
N’unzigame, Mana yanje, kuko ari Wewe mahungiro yanje.
Nabwiye Umukama nti : « Umukama ni Wewe.
Mukama, ni Wewe ntoranwa yanje, ni Wewe ruhara rwanje,
ni Wewe natoranyeko iragi ryanje. »
Mpezagira Umukama, We muhanuzi wanje,
kandi mw’ijoro hari ico umutima umbarira.
Mpoza Umukama imbere yanje, kuri ico simpengeshanya,
kandi ko asanzwe ari iburyo bwanje sintirimuka.
Umutima wanje urahimbarwa kandi umushaha wanje ukanezerwa,
umubiri wanje na wo ukaruhuka, ataco winona ;
na none, ntiworeka ngo mpfe rubi,
ngo uugenzi wawe aherere mu cobo.
Uzondangira inzira y’ubuzima,
imbere yawe agahimbare ni kose ;
iburyo bwawe akanyamuneza kazokwamaho imyaka yose.
IGISOMWA CA KABIRI
Ivyo dusoma mw’Ibaruwa rya mbere ry’Umutumwa Petero : 1, 17-21
Mwaracunguwe n’amaraso y’igiciro ntangere ya Kristu, wa Mwagazi utagira agahonzi n’inenge.
Ncuti zanje,
Nimwaba muhamagara Data, We atagira nkunzi mu gucira urubanza umuntu wese ku co yakoze, nimwame mwiyubara mu migenzo yanyu mugihe mutarashikira mu ntara yanyu. Murazi neza ko mutacunguwe n’itunga rishira nk’ifaranga canke inzahabu ngo muve mu migenzo y’imburakimazi mwarazwe n’Abasokuru ; mwacunguwe nyabuna n’amaraso y’igiciro ntangere ya Kristu, wa Mwagazi utagira agahonzi n’inenge, wagenywe isi itararemwa, none werekanywe mu misi y’imperuka kubwanyu. Kubwiwe, muremera Imana yamuzuye mu bapfuye, ikongera ikamuha ubuninahazwa ; mbere ukwemera kwanyu gushimikiye ku Mana, ni Yo mizero yanyu.
INKURU NZIZA
Alleluya, alleluya.
Mukama Yezu, n’utwumvishe ivyanditswe mu Bitabu Vyeranda !
Umutima wacu wuzure urukundo, niwatuganiriza.
Ivyo dusoma mu Nkuru Nziza yanditswe na Luka : 24, 13-35
Bamenye Umukama aho yamanyura umukate
Ku musi ugira gatatu kuva aho Yezu apfiriye, abigishwa babiri baja mu gisagara citwa Emausi : kuva i Yeruzalemu, ni urugendo rw’isaha zibiri ; bagenda baraganira ivyari vyabaye vyose. Barabiganira kandi bakabiharira ; Yezu na We arabegera ngo bafatanye akayira ; ariko amaso yabo ntiyashobora kumumenya. Arababaza ati : « Ivyo mugenda muratoshanya ni ibiki ? » Barahagarara bijiriwe.
Umwe muri bo yitwa Kleofasi, aramwishura ati : « Ni wewe musa uciye i Yeruzalemu utazi ivyabaye muri iyi misi ? » Na We ati : « Vy’ibiki ? » Bati : « Ivya Yezu w’i Nazareti : yari umuhanuzi w’agakura mu mvugo no mu ngiro, imbere y’Imana n’imbere y’abantu : abakuru b’abasaserdoti n’abashingantahe bacu baramuguze, bamucira urwo gupfa, bagirako bamubamba ku musaraba ; ariko tweho twari twizigiye ko ari We yari gucungura Israeli ! None bukeye gatatu ivyo bintu vyabaye ! Hari abagore bamwe mu bacu bahoze ku ruhafu kare baje kudutera ubwoba : ntibabonye ikiziga ciwe, yamara baje kutubwira ko babonye abamarayika bababariye ko ari muzima.
Yezu rero arababwira ati : « Mwa biburabwenge mwe, nta mutima mugira ngo mwemere ivyo abahanuzi bavuze ! None, ntikwari ko ngo Kristu arinde ayo magorwa yose, kugira ngo ashikire ubuninahazwa bwiwe ? » Ahera rero kuri Moshe, ahetura abahanuzi bose, abasigurira ivyanditswe mu Bitabu bimwerekeye. Begereje umuhana bajamwo, Yezu amera nk’uwubandanya. Ariko baramwinginga bashimitse bati : « Ingo tugumane aha, burije n’izuba ryarenze. » Araheza arabakurikira.
Avyagiye ku meza hamwe na bo, yakira umukate, arawuhezagira, arawumanyura, arawubahereza. Amaso yabo aca arakanura, baramumenya, yamara buno nyene acacaranyika. Baraheza baravugana bati : « Erega niho umutima wacu wari wuzuye urweze aho twafatanya akayira atubwira ivyanditswe mu Bitabu Bitagatifu ! » , Muri ino saha nyene, barahaguruka, basubira i Yeruzalemu, basanga bamwe cumi n’umwe bakoranye n’abandi bagenzi babo bari kumwe. Bariko baravuga ngo : « Ni ivy’ukuri, Umukama yazutse, yabonekeye Simoni. » Na bo babiganira ivyo babonye mu nzira n’ingene bamumenye aho yamanyura umukate.
Partager
IGENEKEREZO RYA 1 RUSAMA : YOZEFU MWERANDA, UMUKOZI
(Mu Burundi, ni Umusi Mukuru cane)
IGISOMWA CA MBERE
Ivyo dusoma mu gitabu c’Amamuko : 1, 1. 26-2, 3
Mu ntango, Imana yaremye ijuru n’isi. Imana iraheza ivuga iti : « Ingo tureme umuntu tumwishushanye, ase natwe ; agabe ifi zo mu kiyaga, ibikoko, inyamaswa zose, be n’ubwoko bwose bunyogomba hasi. » Imana iraheza irema umuntu iramwishushanya, irema uwufise agashusho k’Imana, irema umugabo n’umugore. Imana irabahezagira ibabwira iti : « Nimurondoke, mugwire, mwuzure isi, muteko muyigabe. Mugabe ifi zo mu kiyaga, inyoni zo mu kirere, be n’ibikoko vyose vyagamba kw’isi. » Imana iraheza ivuga iti : « Ndabahaye ibiremwa vyose vyama imbuto bikwiye isi yose, be n’ibiti vyose bifise ivyamwa birimwo imbuto ; bizobabere imfungurwa. Inyamaswa zose be n’inyoni zose zo mu kirere, ivyikwega hasi vyose kandi biri n’ubuzima, ndabagabiye ibimera vyose kandi biri n’itoto ngo bibabere indya. » Bica biba gutyo. Imana ikubitiza ijisho ku vyo yari yagize : vyari vyiza cane. Haba umugoroba, haba n’igitondo : uba umusi ugira gatandatu.
Gurtyo rero, ijuru n’isi hamwe n’inteko zavyo, vyari bihejeje guhingurwa. Ku musi ugira indwi, Imana irasozera igikorwa yari yagize ; hanyuma ku musi w’indwi iraruhuka, imaze kurangiza ico gikorwa cose yari yagize. Ng’ayo amamuko y’ijuru n’isi igihe vyaremwa.
IZABURI 89 (90), 2. 3-4. 12-13. 14. 16b
Icit : N’udushimangirire, Mukama,
ivyo dukora n’amaboko yacu.
Imisozi itarabaho,
utararema isi n’ibihugu,
Weho wamye uri Imana
Kuva kera na rindi.
Abantu urabasubiza mw’ibumba,
urababarira uti : « Bana b’abantu, nimusubireyo ! »
Mu maso yawe, imyaka igihumbi imeze nk’umusi w’ejo wahise,
canke nk’igishingo kimwe c’ijoro.
N’utwigishe guharūra imisi yacu,
kugira ngo dukerebuke mu bwenge
Ewe Mukama, garuka uzogeza ryari ?
Niwirimbuze mu vyo ugirira umusavyi wawe.
N’udukwize urukudo rwawe mu gitondo ca kare,
niho twoheza tukamara umusi wose mu karirimbo no mu kanyamuneza.
Igikorwa cawe niciserure ku basavyi bawe,
be n’agahimbare kawe ku bana bawe.
IGISOMWA CA KABIRI
Ivyo dusoma mw’Ibaruwa Umutumwa Paulo yandikiye Abakolosi : 3, 14-15. 17. 23-24
Ncuti zanje,
Ico mwokwitwararika imbere ya vyose, ni uko mwokwamana urukundo, kuko ari rwo rutuma umuntu aba intungane ishitse. Vyomngeye, amahoro ya Kristu n’ahangame mu mishaha yanyu, ayo mahoro ni yo mwahamagariwe gusangira mu Mubiri umwe, maze, mwame mukenguruka na ntaryo.
Ivyo muvuga canke ivyo mukora vyose, murame mubigira kw’izina ry’Umukama Yezu, mumwihekeko mu gukengurukira Imana, Umuvyeyi wacu. Ivyo mukora vyose, mubikore bivuye ku mutima nk’abakorera Umukama, ntimube nk’abakorera abantu : murazi neza ko Umukama ari We azobaronsa impera mu kubagira ba Samuragwa biwe. Umukama Yezu ni We mukorera.
INKURU NZIZA
Alleluya, alleluya.
Umukama n’ashimagizwe imisi n’iyindi,
We Mana Mukiza wacu, yiremetseko ibituremereye.
Ivyo dusoma mu Nkuru Nziza yanditswe na Matayo : 13, 54-58
Muri irya misi, Yezu yagarutse mu ntara iwabo, arigishiriza mw’isinagoga ryabo.
Abantu baratamarirwa bavuga bati : « Mbega ubwo bwenge n’ivyo bitangaro biva hehe ? None, urya si wa muhungu w’umubaji ? Nyina ntiyitwa Mariya, benewabo si Yakobo, Simoni na Yuda, bashikibe bose ntitubana ? None, ivyo bintu vyose abikura hehe ? » Bibatera umutima mubi.
Yamara Yezu We ababwira ati : « Umuhanuzi ntiyigera aninahazwa mu gihugu yavukiyemwo no mu muryango iwabo. » Nta bitangaro vyinshi rero yahagiriye kubera ubugaba bwabo.
Partager
IDOMINIKA YA 2 YA PASIKA-Umwâka A
IGISOMWA CA MBERE
Ivyo dusoma mu gitabu c’Ibikorwa vy’Abatumwa : 2, 42-47
Abari basangiye ukwemera bari basangiye n’itunga
Abigishwa barashishikara cane mu vyo kwigishwa n’Abatumwa n’ukugira ubumwe, mu vyo kumanyura umukate no gusenga. Kandi, ibitangaro n’ibimenyetso vyinshi bikagirwa n’Abatumwa. Bitayeko, abari basangiye ukwemera bari basangiye n’itunga : baramuka baguze ivyo batunze canke ivyimburwa, bagasabikanya ikiguzi, umwe umwe akaronka ivyo akeneye.
Bama mw’isengero imisi n’iyindi, kandi bashize hamwe ; utwo bafungura imuhira, badufungurana urweze n’umutima mwiza. Uko niko bama baninahaza Imana, bagakundwa n’igihugu. Umukama na We yama yongera imisi yose kuri uwo muryango abo yitoreye.
IZABURI 117 (118), 2-4. 13-15. 22-24
Icit : Shemeza Umukama kuko ari mwiza,
kuko ubuntu bwiwe bwamaho imyaka yose !
Canke : Alleluya.
Umuryango w’Israeli n’uvuge uti :
Ubuntu bwiwe bwamaho imyaka yose !
Umuryango wa Aroni n’uvuge uti :
Ubuntu bwiwe bwamaho imyaka yose !
Abubaha Umukama bose nibavuge bati :
Ubuntu bwiwe bwamaho imyaka yose !
Baransunaguye ngo ntembe,
mugabo Umukama We yarantabaye.
Umukama ni We magara yanje, nanje nzomuyaga ;
kanatsinda ni We yankijije.
Impundu z’ugutabaruka zirahaniranwa mu nzu z’aberanda ;
ukuboko kw’Umukama kwarakoze ibitangaza.
Rya buye abubatsi batora bagashibura,
ni ryo ryabaye iremezo.
Ivyo bitangaza twabonye
Vyabonetse kubw’Umukama.
Ng’uyu umusi Umukama yagize,
turanezerewe, turahimbawe.
IGISOMWA CA KABIRI
Ivyo dusoma mw’Ibaruwa rya mbere ry’Umutumwa Petero : 1, 3-9
Imana yarasubiriye kuturema kubw’izuka rya Yezu Kristu mu bapfuye ngo turonke ukwizera gukomeye
Imana Se w’Umukama wacu Yezu Kristu, n’ihezagirwe ! Ku kigongwe cayo, yarasubiriye kuturema kuturema kubw’izuka rya Yezu Kristu mu bapfuye, ngo turonke ukwizera gukomeye, duhabwe rya toranwa ridatituka, ritagira akanenge mwabikiwe mw’ijuru, mwebwe ububasha bw’Imana burorereje gukiza kubera ukwemera kwanyu, mu gihe c’imperuka.
Ivyo birabanezereza n’aho nyene ubu mukibabazwa n’amakuba atari make, kugira ngo ukwemera kwanyu kurusha igiciro inzahabu bacishije mu ruganda kuze kubatera ishimagizwa, ininahazwa n’iteka ku musi Yezu Kristu azokwihishurira : uyo Yezu, muramukunda n’aho mutigeze mumubona, kandi n’ubu n’aho mutaramubona, muramwemera, mukanazerwa akanyamuneza katavugwa kandi kuzuye ubuninahazwa, kuko muzi neza ko muzoshikira iherezo ry’ukwemera kwanyu aribwo bukiriro bw’imitima.
INKURU NZIZA
Alleluya, alleluya.
Umukama yavuze ati : « Ewe Toma, wemeye kuko umbonye.
Hahiriwe abazokwemera ataco barinze kubona. »
Alleluya, alleluya.
Ivyo dusoma mu Nkuru Nziza yanditswe na Yohani : 20, 19-31.
Imisi umunani iheze, Yezu araza
Ku mugoroba w’uyo musi ariwo mubarwa wa mbere w’indwi, mu nzu yarimwo abigishwa, bari bakinze inzugi ku gutinya Abayahudi. Niho rero Yezu yaza, ahagarara hagati muri bo, ababwira ati : «Nimugire amahoro ! » Avuze atyo, abereka ibiganza vyiwe n’urubavu rwiwe. Abatumwa ngo babone Umukama, barahimbarwa.
Yongera ababwira ati : « Nimugire amahoro ! Kumwe Data yantuma, nanje niko ndabatumye. » Ababwiye ivyo, arabahuha ati : « Nimuronke Mutima Mweranda. Abo muzorekurira ibicumuro, bazoba babirekuriwe, abo muzobigumizako na bo, bizobagumako. »
Aho Yezu yaza, Toma, umwe wo muri bamwe Cumi na babiri, ariwe bita Didimo, ntiyari muri bo. Abandi bigishwa bamubwiye bati : « Twabonye Umukama », abishura ati : « Ntiboneye mu biganza vyiwe intoboro za ya misumari, ngo nshire urutoke mu ntoboro zayo, n’urushi mu rubavu rwiwe, sinzokwemera. »
Imisi umunani iheze, abigishwa basubira guteranira muri ya nzu, na Toma bari kumwe. Yezu araza, inzugi zugaye, ahagarara hagati muri bo ati : « Nimugire amahoro ! » Hanyuma abwira Toma ati : « Shira urutoke ngaha : ng’ibi ibiganza vyanje ; zana urushi rwawe kandi urushire mu rubavu rwanje : ureke rero kuba ikigaba, ariko wemere. »
Toma amwishura ati : « Mukama wanje, Mana yanje ! » Yezu na We amwishura ati : « Ewe Toma, wemeye kuko umbonye : hahiriwe abazokwemera ataco barinze kubona. »
Hari n’ibindi bimenyetso vyinshi bitanditswe muri iki gitabu Yezu yagiriye imbere y’abigishwa biwe. Ivyo rero vyanditswe ngo mwemere ko Yezu ari Kristu Umwana w’Imana, kugira kandi ngo muvyemeye, muronke ubuzima kw’izina ryiwe.
Évangéliser les aréopages contemporains 