Accueil » Parole de Dieu (en Kirundi) (Page 106)
Archives de Catégorie: Parole de Dieu (en Kirundi)
Mes Photos sur Flickr
Idominika y’7 ya Pāsíka (Umwâka A)
IGISOMWA CA MBERE
Ivyo dusoma mu gitabu c’Ibikorwa vy’Abatumwa : 1, 12-14
(Bose bari n’umutima umwe mu gushishikara gusenga)
Yezu amaze kwurira mw’ijuru, abatumwa baciye bagaruka i Yeruzalemu bavuye ku gasozi ka Oliveti kari hafi ya Yeruzalemu. Bashitseyo, baca burira mu cumba cο hejuru aho bari basembereye. Hari Petero na Yohani, Yakobo na Andreya, Filipo na Toma, Bartolomeo na Matayo, Yakobo mwene Alfei, Simoni Umuzelote na Yuda mwene Yakobo. Bose bari n’umutima umwe mu gushishikara gusenga, hamwe n’abakenyezi nka Mariya nyina wa Yezu na benewabo.
IZABURI 26 (27), 1. 4. 7-8a
Icit : Ndavyemeye, nzobona Umukama agira neza
Kuri iyi si y’abazima.
Canke : Alleluya.
Umukama ni We rumuri rwanje, ni We bukiriro bwanje,
notinya nde wundi ?
Umukama ni We nkingi y’ubuzima bwanje,
ni nde yompindisha agashitsi ?
Hari ikintu nsaba Umukama,
ndagicambirwa ;
ni ukuba mu ngoro y’Umukama,
imisi yose y’ubuzima bwanje.
Mukama, ndagutabaza, n’unyumvire :
ngirira ikigongwe, unyishure !
Sinibagiye ko wavuze uti :
« Rondera inyonga zanje. »
IGISOMWA CA KABIRI
Ivyo dusoma mw’Ibaruwa rya mbere ry’Umutumwa Petero : 4, 13-16
(Nimwaba mutukwa kw’izina rya Kristu, murahiriwe)
Ncuti zanje,
Nezerewe kuko musangiye na Kristu amakuba yababaye, kugira ngo umusi ubuninahazwa bwiwe buzokwibonekeza muze munezerwe muhimbarwe. Nimwaba mutukwa kw’izina rya Kristu, murahiriwe, kuko Mutima w’ubuninahazwa ariwe Mutima w’Imana muri kumwe.
Ntihagire n’umwe muri mwebwe abona amagorwa kuko ari umwicanyi canke igisuma canke inkozi y’ikibi canke abeshera abandi ; ariko, niyaba agorwa kuko ari umukristu, ntibimutere isoni, n’aninahaze riho Imana kuko yitwa iryo zina.
INKURU NZIZA
Alleluya, alleluya.
Umukama yavuze ati : « Sinzobasiga muri impfuvyi ;
ndagiye, mpeze nze ngaruke muri mwebwe,
umutima wanyu wuzure akanyamuneza. »
Alleluya, alleluya.
Ivyo dusoma mu Nkuru Nziza yanditswe na Yohani : 17, 1-11a
(Dawe, ninahaza Umwana wawe)
Mu gihe yari mu kuva kuri iyi si ngo asubire kwa Se wiwe,
Yezu yariko arasenga ahanze ijuru, avuga ati : « Dawe, ubutigu burageze : ninahaza Umwana wawe, Umwana wawe na we abone kukuninahaza yongere ahe ubuzima budahera abo wamuhaye bose kubera ububasha wamuhaye ku citwa ikiremwa cose. Ubuzima budahera na bwo, ni ukukumenya Wewe Mana rudende y’ukuri n’uwo watumye Yezu Kristu.
Narakuninahaje kw’isi, nararanguye ibikorwa wanshinze gukora. None, Dawe, n’uninahaze hafi yawe, umpe bwa buninahazwa nari mfise hafi yawe isi itararemwa.
Naramenyesheje izina ryawe abantu wampaye, wabakuye mu bandi. Bari abawe, urabampa, kandi barazigamye ijambo ryawe.
Ubu barazi ko ico wampaye cose cavuye kuri Wewe ; kuko amajambo wampaye nayabashikirije, na bo barayakira, baramenya vy’ukuri ko namuka kuri Wewe bongera baramenya ko ari Wewe wantumye.
Ni bo nsabira, sinsabira isi, nsabira abo wampaye, kuko ari abawe. Erega, ivyanje vyose ni ivyawe kandi ivyawe vyose ni ivyanje ; muri bo rero ndaninahajwe. Sinkiri kw’isi, yamara bo bari kw’isi ; nanje nje iwawe.»
Partager
UMUSI MUKURU WA ASENSIYO (Umwâka A)
Menya neza:
Aha twanditse ibijanye n’umwaka A vyonyene. Mu mwaka B canke C, ku gisomwa ca kabiri, hariho ibindi bisomwa bashobora gukoresha. Ivyo na vyo muzobisanga mu gihimba canditsemwo umwaka B canke C. Igisomwa ca mbere ntigihinduka ku myaka yose. Umwaka wose ufise Inkuru Nziza yawo.
IGISOMWA CA MBERE
Ivyo dusoma mu gitabu c’Ibikorwa vy’Abatumwa : 1, 1-11
(Abatumwa babona Yezu ariko arurira mw’ijuru)
Mu gitabu ca mbere nanditse, ga Teofilo we, naravuze ivyo Yezu yagize kandi yigishije kuva agitangura gushika umusi yurira mw’ijuru, ahejeje gusigarana amategeko ba batumwa yari yitoreye kubwa Mutima Mweranda.
Aho amariye kubabara, abo batumwa ni bo yabonekeye abaha imenyetso nyinshi z’ukubereka ko ari muzima : yamaze imisi mirong’ine ababonekera yongera abayagira ivy’Ubwami bw’Imana. Ngo ahengere bariko barasangira imfungurwa, abategeka kuguma i Yeruzalemu, ngo barorerereho wa muhango Data yari yabahaye. Ababwira ati : « Yohani yabatirisha amazi ; mu misi iza kuza, mwebwe muzobatizwa muri Mutima Mweranda. »
Abari bahakoraniye barahava bamubaza bati : « Mbega, Mukama, ubu niho ugira ngo ubogore ingoma y’Israeli ? » Abishura ati : « Ivy’ukumenya igihe n’isango Data yigeneye We nyene ubwiwe, si ivyanyu. Mugabo, muzoronka ubukomezi Mutima Mweranda azobazanira mu kubururukirako. Muzoca muja kumbera ivyabona i Yeruzalemu no mu Buyudeha bwose no muri Samariya, mugarukire iyo isi igarukira. »
Ngo aheze kuvuga ivyo, babona ariko araduga, hanyuma igicu kirampfuka, ntibaba bakimubona. Bakiri aho bahanze amaso ijuru, Yezu na we ariko araduga, baja babona abantu babiri bambaye ivyambarwa vyera, bababwira bati : « Mbega, bantu b’i Bugalile, igituma muguma muhagaze murangamira hejuru ni iki ? Uyu Yezu mubonye ava hagati yanyu akurira mw’ijuru, uko agiye ni ko azogaruka. »
IZABURI 46 (47), 2-3. 6-7. 8-9
Icit : Imana iraduze hagati y’abayivugiriza impundu,
Umukama araduze hagati y’abamuvugiriza inzamba.
Canke : Alleluya.
Ntara zose iyo muva mukagera, nimukome amashi,
muvugirize impundu Imana mu kanyamuneza kamuje.
Kuko ari Yo Mukama, Rudasumbwa, Muterakoba,
Mwami w’agakura aganza isi yose.
Imana iraduze hagati y’abayivugiriza impundu,
Umukama araduze hagati y’abamuvugiriza inzamba.
Curarangira Imana yacu, curaranga,
curarangira umwami wacu,curaranga !
Kuko Imana ari Yo mwami w’isi yose :
nimuyiririmbire ururirimbo rw’akayazwe !
Imana yarironkeye ubwami mu mahanga yose,
ngo yongere ivyagire ku ntebe yayo nyeranda.
IGISOMWA CA KABIRI
Ivyo dusoma mw’ibaruwa Umutumwa Paulo yandikiye Abanyefezi : 1, 17-23
(Imana yaramuvyagije iburyo bwayo mw’ijuru)
Ncuti zanje,
Ese Imana y’Umukama wacu Yezu Kristu, ariyo Muvyeyi Nyen’ubuninahazwa, yobaha umutimaw’ubwitonzi n’ubumenyi, ngo uyibahishurire, muyimenye neza !
Ese yomurikira amaso y’imishaha yanyu, kugira ngo murimbure ukwizigira yabahamagariye uko kungana, mwongere murimbure ububasha yakoresheje kuri twebwe, abemera, uko bungana.
Yarabwerekanye muri Kristu, aho yamuzura mu bapfuye, ikamuvyagiza iburyo bwayo mw’ijuru, ikamushira hejuru y’abamarayika bose uko bangana, eka mbese imbere y’irindi zina ryose umuntu ashobora kuvuga, ari ubu canke mu myaka izoza.
Ibindi vyose yarabimuhaye ngo abigabe abiganze, imushira hejuru ya vyose, imugira Umutwe w’Ekleziya, ariyo Mubiri wiwe, Musesekara w’uwunengesereza vyose mu buryo bwose.
INKURU NZIZA
Alleluya, alleluya.
Umukama yavuze ati :
« Gende, mwigishe abantu bose !
Nanje ndi kumwe namwe ubutakibavirira,
gushika ku muhero w’isi. »
Alleluya.
Ivyo dusoma mu Nkuru Nziza yanditswe na Matayo : 28, 16-20
(Naronse ubukuru bwose mw’ijuru no kw’isi)
Muri irya misi,
ba bigishwa cumi n’umwe bagiye i Bugalile, ku musozi Yezu yari yabagenekereje. Bamubonye, baramupfukamira, yamara harimwo abakekereza.
Yezu abegereye, arababarira ati : « Naronse ubukuru bwose mw’ijuru no kw’isi. Gende rero mwigishe abantu bose, mubabatize kw’izina rya Data n’irya Mwana n’irya Mutima Mweranda, mubigishe gukora ivyo nabategetse vyose. Nanje ndi kumwe namwe ubutakibavirira gushika ku muhero w’isi. »
Partager
Idominiká ya 6 ya Pāsíka (Umwâka A)
IGISOMWA CA MBERE
Ivyo dusoma mu gitabu c’Ibikorwa vy’Abatumwa : 8, 5-8. 14-17
(Barabagranzurirako ibiganza, baronka Mutima Mweranda)
Muri irya misi,
Filipo yari yamanutse mu gisagara c’i Samariya kumenyesha Kristu. Abamutega yompi bari indiri, kuko bose bumva canke bakibonera ibitangaro yakora. Abari biziziwe na Shetani, yarabavamwo ikagenda iraboroga ; kandi abari bamugaye n’abacumbagira benshi yarabakiza. Igisagara cose cari mu kanyamuneza.
Abatumwa bo bari bagumye i Yeruzalemu, bumvise ko Samariya imaze kwigishwa Ijambo ry’Imana, barungikayo Petero na Yohani. Na bo bamaze gushikayo, barabasabira ngo Mutima Mweranda abazeko ; bari bamaze kubatizwa gusa kw’izina ry’Umukama Yezu, mugabo nta n’umwe yari bwaronke Mutima Mweranda. Nya batumwa rero barabagaranzurirako ibiganza, baronka Mutima Mweranda.
IZABURI 65 (66), 1-3a. 4-5. 6-7a. 16. 20
Icit : Bantu muri kw’isi yose, shimagize Imana.
Canke : Alleluya.
Bantu muri kw’isi yose, shimagize Imana,
muririmbire izina ryayo rininahaye,
muhimbaze ishimagizwa ryayo !
Mubwire Imana muti : « Ibikorwa vyawe ni agahambaye ! »
Abari kw’isi yose baricisha bugufi imbere yawe,
bakayaga, bakaririmba izina ryawe !
Nimuze, mwirabire ibikorwa vy’Imana,
ibitangaza yagiriye abantu ni agahambaye.
Yarahinduye ikiyaga ahumutse,
Abantu barijabukiye uruzi, ibirenge bidakandagiye mu mazi.
Aho ni ho dukura akanyamuneza kacu,
Kuko ategekana ububasha imyaka n’imyaka.
Abubaha Imana mwese,
Nimuze mwumvirize ivyiza yangiriye.
Imana n’ishimagizwe, Yo itirengagije igisabisho canje,
Ntinyime urukundo imfitiye.
IGISOMWA CA KABIRI
Ivyo dusoma mw’Ibaruwa rya mbere ry’Umutumwa Petero : 3, 15-18
(Yarishwe kuvy’umubiri, ariko yarasubiye kuba muzima kuvy’umutima)
Ncuti zanje,
Nimwubahe mu mishaha yanyu Umukama Yezu, mwame mufise iryo mwishura uwo wese ababaza igituma mufise umwizero. Mubigirane icubahiro, n’umutima wanyu utekanye, kugira ngo, kubera imigenzo myiza mufise muri Kristu, abababeshera bataterwe mu kubavuga nabi.
Na none, mwopfuma mubabara muhorwa iciza mukora, iyo ari co Imana ishaka, hako muhorwa inabi. Nangwa na Kristu We nyene yarapfuye rimwe rizima kubera ibicumuro, We ntungane apfira abononyi, kugira ngo adushikane ku Mana. Yarishwe kuvy’umubiri, ariko yarasubiye kuba muzima kuvy’umutima.
INKURU NZIZA
Alleluya, alleluya.
Umukama yavuze ati : « Uwunkunda azozigama ijambo ryanje,
Na Data azomukunda, duheze tuze iwe. »
Alleluya, alleluya.
Ivyo dusoma mu Nkuru Nziza yanditswe na Yohani : 14, 15-21
(Nzosaba Data, na We azobaha uwundi Mutabazi)
Mu gihe yari mu kuva kuri iyi si ngo asubire kwa Se wiwe,
Yezu yabariye abigishwa biwe ati : « Nimwaba munkunda, muzozigama amabwirizwa yanje, nanje nzosaba Data, na We azobaha uwundi Mutabazi muzokwamana imisi yose. Azobaha Mutima w’ukuri, isi idashobora kwakira kuko itamubona ntinamumenye. Mweho muramuzi kuko abana namwe kandi ari muri mwebwe.
Sinzobasiga muri impfuvyi, nzogaruka kubaraba. Ni akanya gato isi ntibe ikimbona ; mweho yamara muzombona, kuko ndiho, namwe nyene muzobaho. Kuri uyo musi, muzotegera ko ndi muri Data, namwe muri jewe, nanje muri mwebwe. Uwakira amabwirizwa yanje akayazigama, ni we ankunda : na we uwunkunda, azokundwa na Data, nanje nyene nzomukunda nongere ndamwimenyeshe. »
Évangéliser les aréopages contemporains 