Accueil » Parole de Dieu (en Kirundi) (Page 77)
Archives de Catégorie: Parole de Dieu (en Kirundi)
Mes Photos sur Flickr
IDOMINIKA YA 11 YO MU MWAKA (Umwâka C)
IGISOMWA CA MBERE
Ivyo dusoma mu gitabu ca kabiri ca Samuweli (12, 7-10.13)
Dawidi agaya igicumuro ciwe Imana ikamugirira ikigongwe
Dawidi amaze gucumura, Umukama yamutumyeko umuhanuzi Natani. Ashitseyo, aramubarira ati : «Ng’iri iriyazwe n’Umukama Imana y’Israeli : naragusize amavuta, nkugira umwami w’Israeli, naragukijije Sauli, ingabo z’umwansi wawe narazigutsindiye, (abagore ba shobuja narabaguhaye), naraguhaye ingoma ya Israeli n’iya Yuda. Ni vyaba bidakwiye nzokwongera ibindi. None ni kuki wakengereye Umukama ugakora ibimushavuza? Warakubise Uriya wo mu bahititi, araryama, umugandaguza inkota y’Abamoniti, umugore wiwe na we uramwitwarira. None rero, inkota ntizova mu muryango wawe, kuko wankengereye ugatwara muka Uriya, Umuhititi, ukamugira umugore wawe.»Dawidi araheza abwira Natani ati : « Nacumuye ku Mukama ! »Natani aramwishura ati : « Noneho Umukama arakurekuriye igicumuro cawe, ntuzopfa. »
IZABURI 31 (32) 1-2, 5, 7, 11
Icit : Undekurire, Mukama, ikibi nakoze.
Hahiriwe uwarekuriwe igicumuro,
uwakize akabi kiwe;
hahiriwe urya Umukama ataco yagiriza.
Navuze nti : “Ngiye gutumbera Umukama,
nirege ibicumuro nakoze.”
Nawe, Mukama, warandekuriye ikibi nakoze. (suite…)
Partager
IDOMINIKA YA 10 YO MU MWAKA (Umwâka C)
Iri jambo ry’Imana risomwa mu ma Ekleziya basanzwe bahimbaza Umusi Mukuru w’Umushasha Mweranda wa Yezu, ku musi wa 5 ukurikira Umusi Mukuru w’Isakaramentu Ryeranda.
IGISOMWA CA MBERE
Ivyo dusoma mu gitabu ca mbere c’Abami (17, 17-24)
Umwana wawe yasubiye kuba muzima
Muri irya misi, hari umwana w’umupfakazi yafashwe n’indwara iraheza iramurabika, aca aracikana. Wa mugore abwira Eliya ati : « Dupfa iki ga muntu w’Imana, waje ngaha kwibukiriza ivyaha vyanje n’ukunyicira umwana ? Eliya na we ati : « Mpereza uwo mwana. » Aramumukura ku bibero, amutwara mu buraro bwiwe, aramuryamika ku buriri bwiwe. Hanyuma aratakambira Umukama ati : « Mukama Mana yanje, mbe uyu mupfakazi yanyihereye indaro, nawe umuhora iki ? Umwana wiwe umumwakiye iki ? » Hanyuma yubarara gatatu kuri nya mwana, atakambira Umukama ati : « Mukama Mana yanje ndagusavye, uyu mwana asubire kuba muzima. » Umukama araheza yumvira Eliya, wa mwana asubira guhema, araba muzima. Eliya aramufata amukura muri bwa buraro, amushira nyina, amubwira ati : « Ng’uyu umwana wawe yasubiye kuba muzima. Wa mugore ati : « Ubu rero, ndemeye ko uri umuntu w’Imana, kandi ijambo ry’Imana uvuga ni iry’ukuri. »
IZABURI 29 (30) 2.4, 5-6. 11.12a. 13b
Icit. : Ndaguhaya, Mukama,
iko wambogoye.
Ndaguhaya, Mukama, kuko wambogoye,
ntiwampaye amenyo y’abansi.
Mukama, wankuye ku cobo,
unsubiza amagara.
Curarangire Umukama abamukunda mwese,
mumushimagize mu kwibuka izina ryiwe ryeranda.
Ishavu ryiwe rimara umwanya urume rumara,
urukundo rwiwe rugahoraho ;
ku mugoroba baraboroga,
mu gitondo bagatarika.
Mukama, nyumviriza, ungirire ikigongwe,
Mukama, n’uze kundokora !
Wankuye kugandara, unjana kuvyina :
Mukama Mana yanje, nzoguhaya imisi yose !
IGISOMWA CA KABIRI
Ivyo dusoma mw’Ikete Umutumwa Pawulo yandikiye Abanyagalati (1, 11-19)
Inkuru nziza Pawulo yigishije ni Inkuru nziza y’Umukama
Ncuti zanje,
Ku vyerekeye Inkuru nziza nabigishije, ndabamenyesha ko iyo Nkuru nziza irengeye abantu, kuko nanje ntayihaye canke ntayigishijwe n’umuntu, ariko ari Yezu Kristu yayimpishuriye. Mwarumvise imigenzo nari mfise kera nkiri mw’idini y’Abayuda, ingene nahîga Ekleziya y’Imana nkayitikiza bimwe birenze urugero, mwarumvise kandi ko mu bwoko bwacu narushije benshi mu bo twarukanye gutera imbere mw’idini y’Abayuda, kuko nabarusha ubwira bw’ukurwanira iragi ry’abasokuru. Ariko, Uwanyisobanuriye nkiri mu nda ya mama akanyihamagarira ku buntu bwiwe, aho ashimiye kumenyesha Umwana wiwe ngo ndamurange mu banyamahanga, buno nyene sinagishije inama umubiri n’amaraso, kandi sinaduze i Yeruzalemu kuraba abantanze kuba abatumwa, ariko nagiye muri Arabiya, hanyuma nsubira i Damasi. Maze, imyaka itatu ishize, nduga i Yeruzalemu kwibonanira na Kefasi, tumarana imisi cumi n’itanu ; mu bandi batumwa, nta wundi nabonye, atari Yakobo, mwenewabo n’Umukama.
INKURU NZIZA
Aleluya, aleluya.
Umuhanuzi mukuru yaserutse iwacu,
Imana yaramukije igihugu cayo.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (7, 11-17)
Kristu, ni we nyen’ubuzima
Umusi umwe, Yezu yari aroye mu gisagara citwa Nayini, agendaniwe n’abigishwa biwe be n’ishengero ryinshi. Ngo atere kw’irembo rya nya gisagara, ahwana n’abajanye umupfu ; na we agasangwa yari umwana w’ikinege, kandi nyina yari yarapfakaye. Nya mupfakazi yari aherekejwe n’abantu benshi bo muri kino gisagara. Umukama ngo amubone, amutera imbabazi, amubwira ati : « Ihorere ! ». Araheza yegera inderuzo arayikorako, abari bamuteruye barahagarara. Avuga rero ati : « Wa musore we, ndabigutegetse, vyuka ! » Uno yari yapfuye aca aravyuka aricara, aca atangura kuvuga. Yezu rero amushikiriza nyina wiwe. Bose bagwa mu gahundwe bashemeza Imana, bati : Umuhanuzi mukuru yaserutse iwacu, Imana yaramukije igihugu cayo. » Iyo nkuru ikwira Ubuyuda bwose n’ibihugu bibangikanye.
Partager
UMUSI MUKURU W’UMUSHAHA MWERANDA WA YEZU (Umwaka C)
Igisomwa ca mbere.
Ivyo dusoma mu gitabu c’Umuhanuzi Ezekiyeli (34, 11-16)
Urukundo Umukama afitiye ubusho bwiwe
Ng’iri iryo Umukama Imana yavumereye :
Noneho, jewe ubwanje ndigiriye kurondera intama zanje,
ndazibungabunge.
Nk’uko umwungere abungabunga ubusho bw’intama ziwe
zashwiragiye,ni ko nzobungabunga intama zanje
ndazikure aho hose zashiragiye ku musi w’igipfungu.
Nzozishwabura ndazikure mu ntara zahoramwo,
nzozikoranya, ndazikure mu mahanga,
ndazigarukane imuhira ; nzoziragira ku misozi y’Israyeli,
mu bibara no ku misozi miremire iremvye y’Israyeli.
Ni ho zizovyagira mu bwatsi butotahaye,
zirishe ubwatsi buremvye ku misozi y’Israyeli.
Ni jewe ubwanje nzoragira intama zanje, ni jewe nzozicûra :
uko ni ko Umukama Imana avuze.
Nzorondera iyatakaye, ngarukane iyazimiye ;
nzosomora iyakomeretse, mvure iyirwaye ;
iyivyibushe igakomera na yo nzoyihozako ijisho,
ndayiragire mu butungane.
IZABURI 22 (23) 1-3a, 3b-4, 5, 6
Icit : Umukama ni We mwungere wanje, nta co nokena
Umukama ni We mwungere wanje,
Sinzokena ; ni We amvyagiza
mu canya c’ubwatsi buremvye.
Iruhande y’amazi adasuma, ni ho azonshikana,
aremeshe umutima wanje ubudasiba.
Ni We anyoborera inzira nziza
ku bw’izina ryiwe.
Sinzogira ico ntinya
n’aho noca mu mwonga mu mwijima,
kuko uri kumwe nanje,
kuko inyobozo yawe impumuriza.
Untegurira ameza mu maso y’abansi ;
wansize amavuta ku mutwe,
igikombe canje kirasesekaye.
Eka mbere mu buzima bwanje
namana impore n’ubuhirwe ;
inzu yanje ni ingoro y’Umukama
imisi yose y’ubuzima bwanje.
IGISOMWA CA KABIRI
Ivyo dusoma mw’Ikete Umutumwa Pawulo yandikiye Abanyaroma (5, 5b-11)
Ikimenyesha c’uko Imana yadukunze ni uko Kristu yadupfiriye
Ncuti zanje, Urukundo rw’Imana rurasasagaye mu mitima yacu kubera Mutima Mweranda twahawe. Igihe twari ba ntamagara, ubutigu bugeze, ni ho yapfiriye abanyakabi. Burya umuntu w’intungane, biragora kumupfira, umuntu w’inda nziza na we, kumbure hari uwokwubahuka kumupfira ! Ariko, icerekana urukundo Imana idukunda, ni uko Kristu yadupfiriye tukiri abanyabicumuro. Noneho, ko twabaye intungane mu maraso yiwe, n’ubu azorushiriza kudukiza ishavu ry’Imana. Mu gihe twari abansi, ko urupfu rw’Umwana w’Imana rwatwuzurije n’Imana, ubu noneho tumaze kwuzura na yo, ubuzima bwiwe buzorushiriza kudukiza. Si ivyo bisa : turishimagiza mu Mana ku bw’Umukama wacu Yezu Kristu, We yatwuzurije n’Imana.
INKURU NZIZA
Aleluya, aleluya.
Umukama yavuze ati : «Nimwemere inganji yanje,
mukunde n’ivyo nigisha, kuko ndi uwitonda
kandi nkicisha bugufi bivuye ku mutima.»
Canke :
Umukama yavuze ati : «Jewe ndi wa Mwungere mwiza,
ndazi intama zanje, na zo zikamenya.»
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (15, 3-7)
Nimumfashe kunezerwa, natoye ya ntama yanje yari yatakaye
Umusi umwe, Yezu yaciriye uyu mugani abigishwa biwe ati : «Muri mwebwe, uwogira intungwa ijana agaheza agatakaza imwe, ntiyorekera mu gahinga zimwe mirongo icenda n’icenda zasigara, akaja kurondera imwe yatakara gushika ayitore ? Ayitoye, araheza akayiterera ku bitugu yigina, yashika imuhira agahamagara abagenzi n’ababanyi, ati : “Nimuze tunezerwe, natoye ya ntungwa yanje yari yatakaye!” Nanje ndababariye : Umusi umunyakabi yigaye, no mw’ijuru hazoba akanyamuneza karuta agaterwa n’aberanda mirongo icenda n’icenda ata kabi biyagiriza.»
Évangéliser les aréopages contemporains 