Accueil » Parole de Dieu (en Kirundi) (Page 68)
Archives de Catégorie: Parole de Dieu (en Kirundi)
Mes Photos sur Flickr
Indwi ya 22 yo mu mwaka. Ku wa 6 (Années paires)
IGISOMWA CA MBERE
Ivyo dusoma mw’Ikete rya mbere Umutumwa Pawulo yandikiye Abanyakorenti (4, 9-15)
Ncuti zanje
Nk’uko ndavyiyumvira, twebwe abatumwa, Imana yatwerekanye nk’abari inyuma ya bose, nk’abaciriwe urwo gupfa, kuko twabaye nk’agahabwa kw’isi, mu maso y’Abamarayika no mu y’abantu, tuba nk’abasazi ku bwa Kristu, namwe mwibera incabwenge muri Kristu ; turi ba ntamagara,mukibera abakomeye ; muri abanyacubahiro, tukaba inkengerwa. Gushika n’ubu, twishwe n’inzara n’inyota, twambaye ubusa, dukubitwa ibipfunsi, tubura ikiragamo, dukoresha amaboko yacu mu bikorwa bituruhisha cane. Baradutuka tugahezagira ; baraduhama tukumirako, baratwambika ibara tukabahoza ; twabaye nk’umwavu w’isi, icatawe na bose gushika n’ubu.
Sinshaka kubatetereza mu kubandikira ivyo, nshaka riho kubahanura nk’abana banje nkunda. Erega, n’aho mwoba mufise muri Kristu abigisha ibihumbi cumi, ntimufise ba so benshi, kuko ari jewe nabibarutse ku bw’Inkuru nziza muri Kristu Yezu.
IZABURI 144 (145) 17-18, 19-20, 21
Icit.: Umukama yama hafi y’abamusaba.
Umukama aratunganye mu vyiyumviro vyiwe vyose,
ni urukundo mu bikorwa vyiwe vyose ;
ntiyikumira abamwitura,
yama hafi y’abamusaba mu kuri.
Umukama agirira neza abamwubaha bose,
arabatega amatwi kandi akabakiza ;
Umukama arazigama abamukunda bose,
ariko ababisha azobahonya bose.
Akanwa kanje nikayage Umukama,
abantu bose nibahezagire izina ryiwe,
imisi yose ubudahengeshanya.
INKURU NZIZA
Aleluya, aleluya.
Ndangira inzira yawe, Mukama,
undǒngōre mu nzira igororotse.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Lu
ka (6, 1-5)
Umusi umwe, hari kw’isabato, Yezu yaciye mu mirima y’ingano, abigishwa biwe na bo bafata imishishi barayivungura, maze barayihembuza. Bamwe mu Bafarizayo barababwira bati : « Ni kuki mukora ikizira ku musi w’isabato ? » Na we Yezu arabishura ati : « Ntimwigeze musoma ivyo Dawudi yakoze igihe yari ashonje, we n’abo bari kumwe, ingene yinjiye mu ngoro y’Imana, akabira imikate y’imperezwa, yamara abaherezankuka ari bo basa bashobora kuyirya ? » Araheza arababwira ati : « Umwana w’umuntu aragaba n’isabato nyene. »
Partager
IDOMINIKA YA 23 YO MU MWAKA (Umwaka C)
IGISOMWA CA MBERE
Ivyo dusoma mu gitabu c’Ubwitonzi (9, 13-19)
Ni Imana itanga ubwenge nya bwenge
Ni nde yoshobora kumenya imigabo y’Imana ? Ni nde yoshobora gutegera ico Umukama ashaka ? Ivyo abagenewe gupfa bahora biyumvira bigarukira hafi, ivyo bahora bipfuza birahindagurika ; nkako nyene, umubiri wagenewe kubora uraremera umutima, ya nzu y’ibumba ikaremereza ubwenge ivyiyumviro vyinshi. Biratugora gutegera ibiri hano kw’isi, ibiri hafi turiruhisha cane ngo tubibone ; none, ni nde uwoshobora guhishura ibiri mw’ijuru ?
Bisubiye kandi, ni nde uwari kumenya ico ushaka, utabanje kumuha ubwenge n’ukumurungikira, uvuye mw’ijuru Umutima wawe Mweranda ? Uko niko inzira z’abantu bo kw’isi zagorowe, uko niko abantu bigishijwe ivyo ushima, ubwenge wabahaye bukabashikiriza urukiza.
IZABURI 89 (90) 3-4, 12-13, 14. 17
Icit : Mukama, wamye uri amahungiro yacu, kuva kera na rindi.
Abantu urabasubiza mw’ibumba, Mukama,
ukababarira uti : « Bana b’abantu, nimusubireyo. »
mu maso yawe imyaka igihumbi imeze nk’umunsi w’ejo wahise,
canke nk’igishingo kimwe c’ijoro.
Ubajana nk’uko isuri itwara, bagaca bahura n’itiro ;
mu gitondo bakamera nk’ivyatsi bikura,
mu gitondo birakura bigashurika,
ku mugoroba bigatemwa, bikuma.
N’utwigishe guharura iminsi yacu,
kugira ngo dukerebuke mu bwenge.
Ewe Mukama, garuka : uzogeza ryari ?
Niwirimbuze mu vyo ugirira abasavyi bawe.
N’udukwize urukundo rwawe mu gitondo ca kare,
niho twoheza tukamara umunsi wose mu karirimbo
no mu kanyamuneza.
Ubuninahazwa bwawe, Mukama, nibudusagire :
n’udushimangirire ivyo dukora n’amaboko yacu.
IGISOMWA CA KABIRI
Ivyo dusoma mw’Ikete Umutumwa Pawulo yandikiye Filemo (9b-10. 12-17)
Uwari umushumba wawe yarabaye mwenewanyu
Mwananje nkunda cane,
Jewe Paulo, n’aho nabaye umutama nkaba n’ubu ndi imbohe kubera Kristu Yezu, hari ico nshaka kugusaba cerekeye Onezimo, wa mwana wanje nivyariye mu ngoyi. Ni we rero nkurungikiye kandi uwo ameze nk’umushaha wanje.
Nari n’iciyumviro c’ukumuzigama hafi yanje ngo ankorere mu kibanza cawe mu ngoyi ndimwo kubera Injili ; ariko, ntavyo nashatse gukora ntakugishije inama, kugira ngo iciza ukora ntikive ku gahato, ariko kive ku gushaka kwawe.
Kumbure icatumye atandukana nawe umwanya mutoyi kwari ukugira ngo umusubizwe imyaka yose, atakiri nk’umushumba, mugabo asumba rwose umushumba, abe mwenewacu mfise ku mutima, nawe urushirizeho kumukunda mu bantu no muri Kristu. Ni uko rero, niwaba wemera ubucuti dufitaniye, n’umwakire nk’uko yoba ari jewe wakiriye.
INKURU NZIZA
Aleluya, aleluya.
Inyonga zawe nizimurikire umusavyi wawe,
unyigishe ivyo ushaka.
Aleluya.
Ivyo dusoma mu Nkuru Nziza ya Yezu Kristu nk’uko yashikirijwe na Luka (14, 25-33)
Uguca ubwenge n’ukwiyambura ivy’isi ugakurikira Yezu
Isinzi ry’abantu ryari rigendaniye Yezu, hanyuma arahindukira ababarira ati : « Umuntu niyaza iwanje ntahebe se na nyina, umugore n’abana, bene nyina na bashikiwe, mbere n’amagara yiwe, ntashobora kumbera umugendanyi. Uwutikorera umusaraba wiwe ngo ankurikire, ntashobora kumbera umugendanyi.
Ni nde muri mwebwe yoshaka kwubaka inzu, ntabanze kwicara ngo arabe ko afise ibiyujuje ? Kugira ngo amaze gutangura ntayite urukankara, bose ngo bamutwenge bati : ‘Uyu muntu yatanguye kwubaka inzu, vyamunaniye kuyuzuza.’ adashobora guheba ivyo atunze vyose, ntashobora kumbera umugendanyi. »
Partager
Indwi ya 22 yo mu mwaka. Ku wa 5. (Années paires).
Ivyo dusoma mw’Ikete rya mbere Umutumwa Pawulo yandikiye Abanyakorenti (4, 1-5)
Ncuti zanje,
Umuntu wese rero n’atubonemwo abasuku ba Kristu n’abashikiriza b’amabanga y’Imana. Nayo ico barondera ku mushikriza, ni uko umwe wese yosangwa ari intatirimuka. Ku bwanje, ivy’ugucirwa urubanza na mwebwe canke n’intahe y’abantu, ndabinezewe buhoro ; mbere na jewe nyene nta rwo nicira. Ni ko, nta co umutima untonganya, ariko si co kingira intungane ; uwuncira urubanza ni Umukama. Ni uko rero, nimureke guca urubanza na rumwe hataragera, igihe Umukama ataraza ; ni we azoboneshereza ivyanyegejwe mu mwijima, kandi azogaragaza inama zose zo mu mishaha. Niho rero umuntu wese azohabwa n’Imana ishimwe rimukwiye
IZABURI 36 (37) 3-4, 5-6, 27-28, 39-40ac
Icit.: Amahoro y’aberanda ava ku Mukama.
Izigire Umukama wongere ukore ivyiza,
ibere kw’isi ata nkomakomyi ;
nezerwa n’Umukama,
azoheza aguhe ico wipfuza.
Hereza vyose Umukama,
umwizigire azovyimenyera ;
azokwerekana ubutungane bwawe nk’iriserutse,
ivy’ukwiye avyerekane kurya kw’umurango utangaye.
N’ureke ikibi, ukore ineza,
niho uzoronka uburagamo bwa misi yose ;
kuko Umukama akunda ubutungane,
ntahemukira abamukunda.
Amahoro y’aberanda ava ku Mukama,
ni We mirukiro yabo mu makuba ;
Umukama arabafasha akabarokora,
bahungiye kuri We arabakiza.
INKURU NZIZA
Aleluya, aleluya.
Jewe ndi Inzira ,Ukuri n’Ubuzima.
Nta wuja kwa Data atanciyeko.
Aleluya.
Ivyo dusoma mu Nkuru nziza ya Yezu Kristu nk’uko yashikirijwe na Luka (5, 33-39)
Muri irya misi, Abafarizayo n’abanditsi babwiye Yezu bati : « Ko none, abigishwa ba Yohani n’ab’Abafarizayo bisonzesha kenshi bagasenga cane, ab’iwawe na bo bakarya bagahimba ! » Yezu arabishura ati : « None mwebwe mushaka ko abagenzi b’umukwe bisonzesha bakiri kumwe na we ? Hazoza imisi yindi… kandi nibabaka umukwe, bazoheza bisonzeshe muri nya misi. »
Yongera arabacira uyu mugani ati: « Nta wutora ikiremo kivuye ku mpuzu nshasha ngo agiterere ku yishize. Kwoba ari ugutabura impuzu nshasha nyene, ya yindi na yo nshasha ntiruhe iberana na ca gitambara gishize.
Kandi nta wusuka igisama c’imvinyu mu mibindi ishaje : ahandi ho, igisama kirayisavya, imvinyu igaseseka, nayo ya mibindi ikaba igiye ityo. Imvinyu y’igisama ibuganizwa mu mibindi mishasha. Vyongeye kandi, nta wanyoye imvinyu imaze gusha, yoshobora kuyinywa amake. Imaze gusha niho iryoha : ni ko babivuga. »
Évangéliser les aréopages contemporains 