Accueil » Parole de Dieu (en Kirundi) (Page 71)
Archives de Catégorie: Parole de Dieu (en Kirundi)
Indwi ya 22 yo mu mwaka. Ku wa gatatu. (Années paires)
IGISOMWA CA MBERE
Ivyo dusoma mw’Ikete rya mbere Umutumwa Pawulo yandikive Abanyakorenti (3, 1-9a)
Benewacu,
Nanje sinashoboye kuganira namwe nk’uko baganira n’abantu bagenzwa na Mutima, ariko nk’uko baganira n’abakiganzwa na kamere yabo y’abantu kandi nk’uko baganira n’abakiri abana b’inzoya muri Kristu. Ivyo nabáhāye ni amata y’ukunywa, si ivyokurya bigumye, kuko mutari bwabishobore ; kandi n’ubu ntimurabishobora, kuko mukiganzwa na kamere yanyu y’abantu.
Mbega, igihe ishari n’imitongano bikiri muri mwebwe, ntimuganzwa se n’iyo kamere nyene, canke ntimwigenza nk’abantu ? Harya umwe avuga ngo : « Jewe ndi uwa Pawulo », uwundi ngo : « Jewe ndi uwa Apolo », ntimwigenza nk’abantu, se?
None se, Apolo ni umuki ? Pawulo na we ni umuki ? Abo ni abakozi batumwe kubashikiriza ukwemera nk’uko umwe wese muri bo yabihawe n’Umukama. Jewe nabivye imbuto, Apolo arazivomera ; ariko Imana ni yo yazimejeje. Niho rero uwuzibiba n’uwuzivomera ata co bamaze, atari Imana izimeza. Uwuzibiba n’uwuzivomera bagira umwe,ariko umwe wese azoronka impembo ikwiranye n’igikorwa ciwe. Nka ko nyene, turi abakozi bakorana n’Imana ; namwe muri umurima w’Imana, kandi mukaba inyubakwa y’Imana.
IZABURI 32 (33) 12-13, 14-15, 20-21
Icit. : Hahiriwe intara y’Imana !
Hahiriwe intara yamwironkeyeko Imana, (suite…)
Partager
Idominika ya 22 yo mu mwaka. (Umwaka C)
IGISOMWA CA MBERE
Ivyo dusoma mu gitabu ca Mwene Siraki (3, 19-21. 30-31) ; (grec 17-18.20.28-29)
Ishimagizwa ry’ugucisha make
Mwananje, rangurana ubwitonzi ivyo ukora vyose, ni ho bazogukunda kurusha amasabo meza. Uko ubukuru bwawe bungana, niko utegerezwa kwicisha bugufi : ni ho uzoshimwa mu nyonga z’Umukama. Nkako, inganji y’Umukama ni agaheta, ariko abifata ruto ni bo bamuninahaza. Uwishima abura uko yogira, kuko inyanduruko y’akabi imubamwo. Umwitonzi we yama yibuka mu muzirikanyi wiwe amajambo y’ubwitonzi ; ico incabwenge ishaka, ni ukugira amatwi akunda kwumviriza.
IZABURI 67 (68), 4-5ac. 6-7b. 10-11
Icit : Kubw’imbabazi zawe, Mukama,
warateguriye urugo umworo.
Aberanda baravugiriza impundu Imana,
baratamba, baratarika. (suite…)
Partager
Ku wa 24 Myandagaro: Bartolomeo Mweranda, Umutumwa. (Umusi Mukuru).
IGISOMWA CA MBERE.
Ivyo dusoma mu gitabu c’Ivyahishuriwe Umutumwa Yohani. (21, 9b-14)
Hanyuma haza umwe muri ba bamarayika indwi bari bafise vya bikombe indwi vyuzuye amashano y’imperuka, aranganiriza ambwira ati: «Ingo ino nkwereke umugeni, wa mugore w’Umwagazi.» Araheza mu vyiyumviro aranjana ku musozi munini kandi muremure, anyereka igisagara ceranda ca Yeruzalemu kimanuka kiva mw’ijuru kwa Mana. Carakayangana n’ubuninahazwa bw’Imana. Umwakaka waco wasa n’uw’ibuye ry’akabuyenge ry’igiciro ntangere, nk’akabuyenge gaca ibibatsi kitwa iyasipi. Cari gifise urugo runini kandi rurerure, cari gifise inzugi icumi na zibiri, iruhande y’izo nzugi hakaba abamarayika icumi na babiri n’amazina yanditseko ari yo mazina icumi n’abiri y’imiryango y’Israyeli. Mu buseruko inzugi zitatu, mu buraruko inzugi zitatu, mu bumanuko inzugi zitatu no mu burengero inzugi zitatu. Urugo rw’igisagara rwari rufise amashimikiro icumi n’abiri no kuri ya mashimikiro icumi n’abiri hariko amazina icumi n’abiri y’abatumwa b’Umwagazi
IZABULI 144 (145), 10-12,12-13ab;17-18
Icitabirizo
Aberanda bawe Mukama, ni bayage ubuninahazwa bw’inganji yawe
Ivyo waremye vyose, Mukama, bizogushimagiza,
abayoboke bawe na bo bazoguhezagira.
Bazorata iteka ry’ubwami bwawe,
bayage ububasha bwawe.
Kugira ngo bamenyeshe abana b’abantu ibikorwa vyawe vy’agatangaza,
n’iteka rininahaye ry’ubwami bwawe.
Ubwami bwawe ni ubwami bw’intahava,
inganji yawe izoganza uko imvyaro zizogenda zirakurikirana.
Umukama ni intungane mu nzira ziwe zose,
akoresha ubuntu mu bikorwa vyiwe vyose.
Umukama yama hafi y’abamutabaza bose,
abamutabaza bose mu kuri
INKURU NZIZA
Alleluya, Alleluya
Mwigisha, uri Umwana w’Imana, uri Umwami w’Israyeli!
Alleluya.
Inkuru Nziza ya Yezu Kristu nk’uko yashikirijwe na Yohani (1,45-51)
Muri irya misi, Filipo ahura na Natanayeli, amubwira ati: «Uwo Musa yanditse avuga mw’Itegeko, n’Abahanuzi nyene bakamuvuga, twamubonye. Ni Yezu, mwene Yozefu, w’i Nazareti.» Natanayeli na we aramwishura ati: «Hari iciza cova i Nazareti?» Filipo aramwishura ati: «Ingo, wirabire!» Yezu abona Natanayeli aje amugana, amubwira ati: «Ng’uwu Umunyisrayeli w’ukuri, azira ikinyoma.» Natanayeli aramubaza ati: «Wamenyeye hehe?» Yezu amwishura ati: «Aho wari munsi y’umutenahi, Filipo ataranaguhamagara, nakubonye.» Natanayeli aca amubwira ati: «Mwigisha, uri Umwana w’Imana, uri Umwami w’Israyeli!» Yezu asubizayo, amubwira ati: «Wemejwe n’uko nkubwiye nti: “Nakubonye munsi y’umutenahi!” Hinge uzobona ibiruta ivyo.» Arongera amubwira ati: «Ni ukuri, ni ukuri ndabibabwiye, muzobona ijuru ryuguruwe n’abamarayika b’Imana burira bongera bamanuka aho Umwana w’umuntu ari.»
Évangéliser les aréopages contemporains 